Beıbitshilik jáne kelisim saraıynda «Ejelgi túrkiler kelbeti» atty biregeı fotokórme ashyldy

Elimizde alǵash ret uıymdastyrylǵan kórmeniń biregeıligi - onyń osydan 1,5-2 myń jyl buryn ǵumyr keshken babalarymyzdyń bet-beınesi bederlengen sýretterden turýy. Kóne túrkiler beınelengen portretter - boıalǵan gıps betperdeler 1883 jyldan bastap osy ýaqytqa deıin Ońtústik Sibir arheologtarynyń ǵylymı ekspedıtsııalarynyń arqasynda saǵanalar men obalardan qazylyp alynǵan. Qazirgi ýaqytta bul biregeı tarıhı qundylyqtar Reseıdegi Ermıtajdyń, Memlekettik tarıhı murajaıdyń, Shyǵys halyqtary murajaıynyń, Hakasııa murajaılarynyń qorynda saqtaýly. Kórmege qoıylǵan jumystar murajaılyq betperdeler qazirgi ýaqytta jańashyldyq ári biregeılik bolyp tabylatyn jaryq qaýyrsyn tehnıkasynda túsirilgen kórkem fotografııalar bolyp tabylady.

Tashtyq mádenıetine tıesili beınelerden eýropalyqtyń da, mońǵol tektestiń de, tipti aralas antropologııalyq tıpti de baıqaýǵa bolady. Bul tashtyq qoǵamyndaǵy etnıkalyq jaǵdaıdyń óte kúrdeli bolǵanyn kórsetedi.

Qazirgi Hakasııa jerindegi arheologııalyq ekspedıtsııalar 1883 jyly A.Andrıonovtyń bastamasymen alǵash ret qolǵa alynyp, qazirgi ýaqytqa deıin búkil álem ǵalymdarynyń nazaryn ózine aýdaryp otyr. Osy jerden tabylǵan kóptegen arheologııalyq artefaktiler Ermıtajdyń, Memlekettik tarıhı murajaıdyń, Shyǵys halyqtary murajaıynyń, Hakasııa ýnıversıteti murajaılarynyń qoryna saqtaýǵa alynǵan.

«Shejire» galereıasy uıymdastyryp otyrǵan bul jobanyń avtory fızıka-matematıka ǵylymdarynyń kandıdaty, Hakasııa tarıhyn zertteýshi Sergeı Narylkov. Ol uıymdastyrǵan «Ejelgi túrkiler kelbeti» atty fotokórme 2009 jyly Novosibirdiń Rerıh, Ombynyń Vrýbel, Krasnoıarskiniń Sýrıkov jáne Irkýtsk, Qazan murajaılarynda, Fınlıandııada, Tatarstan men Bashqurtstanda zor tabyspen kórsetilgen bolatyn.