Beıbitshilik jáne kelisim saraıynda Aqmolanyń Astana bolǵanyna 12 jyl tolýy atap ótildi
sp;ASTANA. Jeltoqsannyń 10-y. QazAqparat /Gúlmıra Álıakparova/ - Búgin keshqurym Astanadaǵy Beıbitshilik jáne kelisim saraıynda Aqmolanyń Qazaqstannyń jańa elordasy, keıin Astana bolyp jarııalaǵanyna 12 jyl tolýyna arnalǵan saltanatty kontsert bolyp ótti. Kontsertti kópshilikpen birge Astana qalasynyń ákimi Imanǵalı Tasmaǵambetov, QR Parlamentiniń depýtattary, memlekettik organdardyń basshylary, belgili qoǵam qaıratkerleri, ǵylym jáne shyǵarmashylyq zııaly qaýym ókilderi tamashalady.
Kontserttiń prology «Bozoq - Aqmola - Astana» bı qoıylymy boldy. Onda tamyryn tereńge tartqan qazirgi Astana qalasy tarıhynyń túrli kezeńderi, atap aıtqanda, qazaq halqynyń derbestigi men azattyǵy jolynda kúresken danagóı bıler men ataqty qolbasshylarymyz, qazaq halqynyń tóbesinde qara bulttar seıilgen kezeńderdegi baqytty shaqtar, 50-shi jyldarǵy tyń ıgerý jáne odan keıingi jańa Astananyń qalyptasýy men qazirgi zamanǵy jastardyń jaısań ómiri beınelendi.
Kontsert QR halyq ártisi Qaırat Baıbosynovtyń oryndaýyndaǵy E.Esbaev pen M.Maıshekınniń «Týǵan el» atty ánimen ashyldy. QR eńbek sińirgen qaıratkeri Aıtqalı Jaıymovtyń basqarýyndaǵy Astana qalasy Memlekettik fılarmonııasynyń ult aspaptar orkestri Qurmanǵazynyń «Saryarqa», N.Tilendıevtiń «Qarasaı batyr» kúılerin oryndasa, QR eńbek sińirgen qaıratkeri Qanat Ahmetovtyń basqarýyndaǵy elordalyq Memlekettik fılarmonııanyń sımfonııalyq orkestri A.Bestibaevtyń «Azııa daýysy» atty merekelik tartýyn jáne K.Baıseıitova atyndaǵy Ulttyq opera jáne balet teatrynyń kameralyq horymen Bethovenniń «Qýanysh odasy» atty №9 sımfonııasynyń sońǵy bólimin oryndady.
Keshte sonymen qatar, Qazaq Ulttyq mýzyka akademııasynyń skrıpkashylar ansambli, «Naz» Memlekettik halyq bı teatrynyń ártisteri, Astana balet kompanııasynyń solısteri, «Sarbazdar» KTK komandasy óner kórsetti.
Merekelik shara I.Grıbýlınniń «Astana» ánimen aıaqtaldy.
Esterińizge sala keteıik, QR Prezıdenti N.Nazarbaevtyń 1997 jylǵy qazannyń 20-syndaǵy Jarlyǵymen, 1997 jylǵy jeltoqsannyń 10-ynan bastap Aqmola respýblıkamyzdyń astanasy bolyp jarııalandy. Al 1998 jylǵy mamyrdyń 6-synan bastap, Astana atty jańa ataýyna ıe boldy. Jańa elordamyz - Astanyń halyqaralyq deńgeıdegi tusaýkeseri 1998 jylǵy maýsymnyń 10-ynda boldy.
