Beıbitshilik jáne kelisim marshy Astanadan bastaý aldy (FOTO)
ASTANA. QazAqparat - Astanada Otan qorǵaýshylar monýmentiniń aldynda ultaralyq jáne dinaralyq yntamaqtastyq halyqaralyq jobasy - «Qaınar kózderge jol» beıbitshilik jáne kelisim marshy ótti.
Sharany uıymdastyrýshylar retinde «Beıbitshilik jáne kelisim» qoǵamdyq qaıyrymdylyq qory (Shymkent qalasy), Qazaqstannyń tatar jáne bashqurt qaýymdastyǵynyń qoldaýymen «Dýslyk» tatar bilim berý-mádenıet ortalyǵy, Astana qalasy ákimdiginiń Saryarqa aýdandyq ardagerler keńesi qatysty. Sapar Qazaqstan elordasynan bastalyp, Reseı, Ýkraına, Rýmynııa, Bolgarııa jáne Grekııa elderiniń qalalarynda jalǵasady dep josparlanýda. Eki aı ishinde jobaǵa qatysýshylar 7310 shaqyrymdy ıgermek, onyń ishinde 1000 shaqyrymǵa jýyǵyn jaıaý júrip ótedi. «Bizdiń basty mindetimiz - dinaralyq dıalog tujyrymdamasyn ázirleýde bastamyshyldyq tanytý bolyp tabylady», - dedi «Beıbitshilik jáne kelisim» qoǵamdyq qaıyrymdylyq qorynyń prezıdenti Rýslan Abdýllın. Beıbitshilik jáne kelisim marshy atqarýshy komıtetiniń jetekshisi Tımýr Seıitovtyń sózine qaraǵanda «Shara azamattyq aktsııa retinde Prezıdent Nursultan Nazarbaevtyń túrli konfessııa ókilderiniń arasyndaǵy dinı tózimdiligi ıdeıasyn júzege asyrý aıasynda ótip jatyr». Saryarqa aýdany Ardagerler keńesiniń ultaralyq qatynastardy nyǵaıtý jónindegi komıssııasynyń tóraǵasy Murat Ábdirahmanov Rýslan Abdýllınge memleketik nyshany bar týdy tapsyrdy.
