Beıbitshilik salasyndaǵy Nobel syılyǵy «Týnıstegi ulttyq dıalog kvartetine» buıyrdy
ASTANA. QazAqparat - 2011 jyly jupar qozǵalysynan keıin Týnıste plıýralıstik demokratııany qurýda qosqan úlesi úshin «Týnıstegi ulttyq dıalog kvarteti» 2015 jylǵy Beıbitshilik salasyndaǵy Nobel syılyǵynyń ıegeri atandy. Bul týraly Reuters agenttigine silteme jasap lenta.ru habarlady.
2013 jyly qurylǵan «Kvartet» tórt negizgi azamattyq uıymnan turady. Olar: Jalpyǵa birdeı Týnıs eńbek birlestigi, Túnıs ónerkásip jáne saýda konfederatsııasy, Týnıstik adam quqyǵy lıgasy jáne Týnıs advokattar qaýymdastyǵy.
«Elde azamattyq soǵys týý qaýpi tóngende "Kvartet" beıbit saıası úrdistiń ótýine septesti», - dedi Nobel komıtetiniń basshysy Karın Sısılle Kýllman Fıve.
Laýreattardy marapattaý rásimi 10 jeltoqsanda - Alfred Nobel qaıtys bolǵan kúni ótedi. Ár syılyqtyń somasy shvedtik 8 mıllıon krondy (972 myń dollar) quraıdy, dep jazdy www.lenta.ru
Jupar tóńkerisi dep Týnıs prezıdenti Zın el-Abıdın Ben Alıdiń saıasatyna qarsy buqaralyq kóterilisti ataıdy. Qoǵamdyq tolqýlar nátıjesinde 2011 jylǵy 14 qańtarda ol otstavkaǵa ketýge májbúr boldy.
