«Beıbitshilik qabyrǵasy» ıadrolyq synaqtardy tolyq toqtatýǵa shaqyrady - Mıroslav Laıchak

ASTANA. QazAqparat - BUU Bas assambleıasynyń tóraǵasy Mıroslav Laıchak elordada «Beıbitshilik qabyrǵasy» monýmentiniń ashylý saltanaty sharasyna arnaıy vıdeojoldaý jiberdi, dep habarlaıdy QazAqparat tilshisi.

«Ókinishke qaraı, búgin Astanadaǵy «Beıbitshilik qabyrǵasy» monýmentiniń ashylý saltanatyna qatysa almadym. Biraq men alysta otyrsam da, osy rásimge qatysýdamyn. Qysqasha eki nárseni atap ótkim keledi. «Beıbitshilik qabyrǵasynyń» ashylýy halyqaralyq ıadrolyq synaqtarǵa qarsy kúres kúnimen baılanysty bolǵandyqtan,  biz bul kúnniń nege mańyzdy ekenin túsinýimiz kerek. Ol ıadrolyq synaqtardy tolyq toqtatýǵa shaqyrady», - deıdi ol.

Mıroslav Laıchak ıadrolyq qarýlardyń synaǵyn ótkizý adamdar men bizdiń planetamyz úshin apatty jaǵdaılarǵa ákelýi múmkin ekenin atap ótti.

«Mine, sondyqtan moratorııdiń erikti negizde qalaı qalyptasatynyn kóremiz. Biraq, bul jetkilikti emes. Óıtkeni ıadrolyq synaqtar áli kúnge deıin bizdiń ómirimizde bolyp jatyr. Buny toqtatý kerek. Tolyq tyıym salýǵa shaqyrýdy qaıtalaýymyz qajet. Qazirgi tańda kóptegen adamdar úshin - ıadrolyq synaqtar alystaǵy qaýip emes. Qazaq halqy ıadrolyq synaqtar ákelgen qasiretten zardap shekti.  Alaıda Qazaqstan ol qarýlarǵa qarsy tura otyryp, ıadrolyq synaqtardy ótkenge qaldyrý úshin burynǵydan da shabyttandyratyn jumysty jalǵastyrdy. 1991 jyly Semeı polıgonyn jabý týraly sheshim qabyldannan ıadrolyq synaqtarǵa qarsy halyqaralyq is-qımyldarǵa deıin Qazaqstan aýqymdy isterdi atqaryp keledi. ıAdrolyq qarýǵa qarsy halyqaralyq kúnniń dál osylaı aýqymdy deńgeıde ótkizilip jatqanyna qýanyshtymyn», - dedi Mıroslav Laıchak.

Eske sala ketsek, Aqtóbe oblysy Astananyń 20 jyldyǵyna «Beıbitshilik qabyrǵasy» monýmentin syıǵa tartty. Monýmenttiń búgin ótken ashylý saltanatyna Memleket basshysy Nursultan Nazarbaev qatysty.