Beıbit Júsipov – Aqmola oblystyq máslıhatynyń jańa tóraǵasy

KÓKShETAÝ. QazAqparat – Kókshetaýda VIIІ shaqyrylym depýtattarynyń qatysýymen Aqmola oblystyq máslıhattyń birinshi uıymdastyrý sessııasy ótti. Jańa quram oblystyq máslıhat tóraǵasynyń kandıdatýrasyn usynyp, oǵan daýys berdi. Bul qyzmet osyǵan deıin oblystyq bilim basqarmasynyń basshysy bolǵan Beıbit Júsipovke júkteldi, dep habarlaıdy QazAqparat tilshisi.

Sessııany oblystyq saılaý komıssııasynyń tóraǵasy Manarbek Sádýov ashty.

Aqmola oblystyq máslıhatynyń depýtattaryn saılaý qorytyndysyn jarııalaı kele, ol saılanǵan depýtattarǵa kýálikter men tósbelgilerdi tapsyrdy.

Sessııa jumysyn jalǵastyra otyryp, Manarbek Sádýov otyrysqa oblys ákimi Ermek Marjyqpaev, onyń orynbasarlary, oblystyq ákimdik apparatynyń, basqarmalar men vedomstvolardyń basshylary, saılaý komıssııasynyń músheleri jáne buqaralyq aqparat quraldarynyń ókilderi qatysatynyn atap ótti.

Beınekonferentsbaılanys rejıminde sessııa jumysyna qalalar men aýdandardyń ákimderi, sondaı-aq máslıhat tóraǵalyry qosyldy.

Aqmola oblystyq máslıhatynyń tóraǵasy bolyp «AMANAT» partııasynyń múshesi Beıbit Júsipov saılandy.

Beıbit Aıtymuly óz sózinde depýtat-áriptesterine kórsetken senimi úshin alǵys aıtyp, oblystyq máslıhattyń segizinshi shaqyrylymynyń jumysy jemisti bolatynyna jáne saılaýshylardyń barlyq ótinishterin oryndaýǵa múmkindik beretinine senim bildirdi.

Sondaı-aq, sessııa barysynda Aqmola oblystyq máslıhatynyń turaqty komıssııalary qurylyp, olardyń tóraǵalary men quramdary saılandy.

Ashyq daýys berý qorytyndysy boıynsha ekonomıka jáne bıýdjet máseleleri jónindegi turaqty komıssııanyń tóraǵasy bolyp Marat Qoıshybaev saılandy, áleýmettik máseleler jónindegi komıssııany Aınagúl Baltasheva basqaratyn boldy.

Depýtattyq etıka, zańdylyq, ekologııa jáne tabıǵat paıdalaný máseleleri jónindegi turaqty komıssııanyń tóraǵasy bolyp Pavel Bezverbnyı saılandy.

Agrarlyq máseleler jáne ındýstrııalyq-ınnovatsııalyq damý jónindegi komıssııany Saıat Syzdyqov basqarady.

Oblystyq máslıhatta kópshilik (32-den 26) orynǵa ıe bolǵan «AMANAT» partııasynyń depýtattyq fraktsııasy tirkeldi.

Máslıhattyń kezekti ekinshi sessııasyna 2022 jylǵa arnalǵan oblystyq bıýdjettiń atqarylýy týraly máseleni engizý usynyldy.

Sessııa sońynda aımaq basshysy Ermek Marjyqpaev depýtattardy quttyqtap, óńirdiń ózekti máselelerin sheshý úshin jergilikti atqarýshy organdarmen tyǵyz qarym-qatynas ornatýǵa shaqyrdy.

Óńir basshysy oblystyń áleýmettik-ekonomıkalyq damýynyń negizgi kórsetkishterine qysqasha toqtalyp, depýtattyq korpýspen birlesip sheshiletin birqatar birinshi kezektegi mindetterdi atap ótti.

Aıta ketsek, Aqmola oblysy máslıhatyna depýtat bolyp kimder saılanǵany belgili boldy.