Beıbit jıyndy uıymdastyrýshylardyń quqyqtary naqty aıqyndalady - zań jobasy

NUR-SULTAN. QazAqparat Beıbit jınalystardy uıymdastyrýshylardyń, qatysýshylardyń quqyqtary men mindetteri naqty aıqyndalady. Bul týraly QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Zańda beıbit jıyndy uıymdastyrýshylardyń, qatysýshylardyń, jýrnalısterdiń mártebesi, quqyqtary men mindetteri bekitiledi. Qoldanystaǵy zań qatysýshylardy, uıymdastyrýshylardy shektemeıdi. Osyǵan oraı zańda uıymdastyrýshylardyń, qatysýshylardyń mártebesin, quqyǵy men mindetterin aıqyndaý usynylady», - dedi mınıstr Májiliste Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrýlar engizý týraly» zań jobalaryn tanystyrý barysynda.

Onyń atap ótýinshe, bul beıbit jınalystardyń qatysýshylary jáne uıymdastyrýshylary bolýy yqtımal tulǵalarǵa talaptardy aıqyndaýǵa múmkindik beredi.

«Uıymdastyrýshylardyń, qatysýshylardyń quqyqtary men mindetteri naqty aıqyndalatyn bolady. BAQ salasyndaǵy ókiletti organ beıbit jınalystarǵa qatysatyn jýrnalıst qyzmetiniń erejesin, jýrnalıstik aıyrmashylyq belgisi pishinin qabyldaıtyn bolady. Uıymdastyrýshylar úshin beıbit jınalystardy ótkizýdiń yńǵaıly bolýy maqsatynda uıymdastyrýshylardyń aıyrmashylyq belgileriniń pishini qabyldanady», - dedi Dáýren Abaev.