Beıbit jıyndar týraly zań jobasynda ulttyq erekshelikter eskerilýi kerek - Belarýs elshisi
NUR-SULTAN. QazAqparat - Belarýs Respýblıkasynyń Qazaqstandaǵy elshisi Anatolıı Nıchkasov QR Beıbit jıyndardy uıymdastyrý men ótkizý tártibi týraly zań jobasyna qatysty pikir bildirdi, dep habarlaıdy QazAqparat tilshisi.
«Zań jobasymen tanysýǵa jaǵdaı jasaǵany úshin QR Syrtqy ister mınıstrligine alǵys aıtamyn. Bul - Prezıdent Qasym-Jomart Toqaevtyń tapsyrmasymen «Halyq únine qulaq asatyn memleket» tujyrymy aıasynda ázirlengen alǵashqy zańdardyń biri. Zań jobasyn ázirleýge saraptamalyq jáne jumys toptary, Májilis, úkimettik emes uıymdar úles qosty. Shynynda da memleket qoǵam usynǵan bastamalardy eskerdi. Zań jobasy 1995 jylǵy jıyndar men mıtıngiler týraly zań qaǵıdalaryn damytady», - dedi dıplomat QR Syrtqy ister mınıstrliginde ótken kezdesýde.
Onyń aıtýynsha, Qazaqstan azamattyq quqyq pen bostandyqty qorǵaý boıynsha barlyq halyqaralyq qujattar men mindettemelerge belsendi qatysady.
«Zań jobasynyń alǵashqy redaktsııasy muqııat qaraldy jáne Májilistegi qaralymda eskertýler aıtylyp, eleýli ózgerister engizildi. Rasynda da qoǵam jıyndar men mıtıngiler, sherýler ótkizýge tolyq quqyly. Ásirese, BAQ qyzmetiniń qatysýyna baılanysty máselege erekshe mán berilgen. Birqatar eskertý memlekettik basqarý organdary men kúshtik qurylymdardyń qatysýymen baılanysty boldy. Senattaǵy qaralymda eleýli ózgerister qabyldanady dep senemin. Qazaqstandaǵy barlyq saıası oqıǵalardan habardar bolyp otyramyz. Óte jaqsy pikirler aıtylyp jatyr. Dıplomattardyń basym bóligi zańger bolǵandyqtan, óz pikirimizdi bildirýimiz qajet dep esepteımin. Bul - qazaqstandyq zań bolýy kerek jáne onda ulttyq erekshelikter eskerilýi tıis», - dedi A. Nıchkasov.
