Beıbit jıyndar týraly zań jobasy ultty biriktiretin qujat bolýy tıis – Erlan Saırov

NUR-SULTAN. QazAqparat - Beıbit jıyn uıymdastyrý tártibi týraly zań jobasy ultty biriktiretin qujat bolýy tıis. Mundaı pikirdi Ulttyq qoǵamdyq senim keńesiniń múshesi Erlan Saırov aıtty, dep habarlaıdy QazAqparat tilshisi.

«Eń aldymen osylaı ústel basyna jınalyp otyrǵanymyzdyń ózi qýantady. Óıtkeni, osy jerde mınıstrliktiń de, azamattyq qoǵamnyń da ókilderi otyr. Osynyń ózi ulttyq ymyranyń bastalǵanyn kórsetedi. Ekinshiden, bul zań negizinde progress sanalady. Biraq, ishinde kóptegen ártúrli suraqtar bar. Dıalog detaldy ashady demekshi, onyń detaldaryn qarastyrý kerek», - dedi ol «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasyn qoǵamdyq tyńdaý barysynda.

Osy rette ol atalǵan zań jobasyn aqyldasyp, oı-pikirlerdi ortaǵa salyp, sodan keıin baryp barlyq tarap ymyraǵa kelgen qujatty qabyldaý qajettigin basa aıtty.

«Biz soǵan qaraı kele jatyrmyz. Sondyqtan osyndaı kezdesýler qajet ári jıi ótýi tıis. Syn da kerek. Óıtkeni, syn bolmasa memlekettik organdar ornynan qozǵalmaıtyny ras. Al endi zań jobasy Parlamentke jetken kezde de ol jerde belgili bir top bolýy kerek dep oılaımyn. Ol topqa halyqaralyq deńgeıdegi sarapshylar kirýi tıis. Bul zań ultty, memleketti biriktiretin qujat bolýy tıis», - dedi Erlan Saırov.