Beıbit jınalystardy uıymdastyrý jáne ótkizý tártibine ózgerister engiziledi
NUR-SULTAN. QazAqparat – Senatta depýtat Vladımır Volkovtyń tóraǵalyq etýimen Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti, dep habarlaıdy QazAqparat.
Onda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrý engizý týraly» zań jobalary qaraldy.
«Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasynda pıketteý, jınalys, mıtıng, demonstratsııa, sherý sııaqty kópshilik pikirin bildirýdi qamtıtyn beıbit jınalystar túrleri kórinis tapqan jáne olardyń negizgi prıntsıpteri qarastyrylady, beıbit jınalystar ótkizýge bolatyn arnaıy oryndardy uıymdastyrýdy qamtamasyz etýge qoıylatyn talaptar aıqyndaldy.
Sondaı-aq memlekettiń qorǵanys qabiletin, qaýipsizdigin jáne halyqtyń tynys-tirshiligin qamtamasyz etetin uıymdardy, onyń ishinde strategııalyq jáne áskerı obektilerdi, sondaı-aq QR Prezıdentiniń, QR Tuńǵysh Prezıdenti – Elbasynyń rezıdentsııalaryna irgeles aýmaqtardy qospaǵanda, kez kelgen jerlerde, onyń ishinde ortalyq memlekettik organdardyń, jergilikti atqarýshy organdardyń ǵımarattary mańynda jeke pıketter ótkizý múmkindigi engizilgen.
Qujatta beıbit jınalystardy uıymdastyrýshylardyń, qatysýshylardyń mártebesi, quqyqtary men mindetteri bekitiledi, memlekettik organdardyń beıbit jınalystar uıymdastyrýshylaryna kómek kórsetý jónindegi mindetteri kózdeledi, jergilikti atqarýshy organdarǵa beıbit jınalystar ótkizýden bas tartý úshin negizderdiń tolyq tizbesi belgilenedi. Odan basqa, beıbit jınalystar ótkizý kezinde úgit ınstıtýty engiziledi, ony uıymdastyrýshylar buqaralyq aqparat quraldary, áleýmettik jeliler, mesendjerler arqyly ótkize alady.
Zań jobasyn qabyldaý beıbit jınalystardy ótkizý salasyndaǵy qoǵamdyq qatynastardy tıimdi retteýge, azamattardyń beıbit jáne qarýsyz jınalýǵa konstıtýtsııalyq quqyǵyn iske asyrýdyń quqyqtyq negizderin qamtamasyz etýge, jınalystar, mıtıngiler men demonstratsııalar, sherýler men pıketter ótkizýge, sondaı-aq azamattyq qoǵam ınstıtýttaryn jáne jeke tulǵa men memleket arasyndaǵy ózara qarym-qatynas tetikteriniń tıimdiligin damytýǵa múmkindik beredi.
Komıtettiń keńeıtilgen otyrysynda depýtattar «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrý engizý týraly» zań jobasyn da qarady.
«Bul zań jobasynda «beıbit jınalys» uǵymynyń engizilýine baılanysty 3 kodeks pen 8 zańǵa ózgerister men tolyqtyrýlar engizý kózdelgen. Sonymen qatar uıymdastyrýshylardyń, qatysýshylardyń ákimshilik zańnamany buzǵany úshin, sondaı-aq sanktsııa berilmegen mıtıngilerdi uıymdastyrǵany jáne qatysqany úshin ákimshilik jaýapkershiligin kúsheıtý usynylady.
Qujatta sonymen qatar «Buqaralyq aqparat quraldary týraly» zańǵa túzetýler de bar, oǵan sáıkes buqaralyq aqparat quraldary salasyndaǵy ýákiletti organ beıbit jınalystarǵa qatysatyn jýrnalıstiń (buqaralyq aqparat quraldary ókiliniń) qyzmet erejelerin, jýrnalıstiń aıyrym belgileriniń nysandaryn bekitedi.
Zań jobasy qoǵamdyq qatynastardy retteıdi jáne azamattyq qoǵam ınstıtýttaryn, azamattar men memleket arasyndaǵy ózara qarym-qatynastardyń jańa tetikterin damytady, azamattardyń beıbit jınalystar ótkizý quqyǵyn iske asyrýǵa baılanysty qoǵamdyq-saıası turaqtylyqty ornyqtyratyn bolady», - dedi palatanyń baspasóz qyzmetinen.
Qujattar palatanyń qaraýyna berildi.
