Beıbit jınalystar týraly jańa zańǵa negizgi alty qaǵıdat engizildi – vıtse-mınıstr

NUR-SULTAN. QazAqparat – Aqparat jáne qoǵamdyq damý vıtse-mınıstri Danııar Esın Memleket basshysy qol qoıǵan beıbit jınalystar jańa zańnyń negizgi alty qaǵıdatyn atady, dep habarlaıdy QazAqparat tilshisi.

Vıtse-mınıstrdiń aıtýynsha beıbit jınalystar jańa zańnyń negizgi alty qaǵıdaty engizilgen. Olar:

- zorlyq-zombylyqsyz sıpat;

- zańdylyq;

- memlekettik qaýipsizdik men qoǵamdyq tártipti saqtaý, basqa adamdardyń densaýlyǵyn, quqyǵy pen erkindigin qorǵaý;

- qatysý erkindigi;

- jınalysty ótkizý paıdasyna qaraı prezýmptsııa;

- taraptardyń jaýapkershiligi.

«Jaýapkershilik qaǵıdaty beıbit jınalystardyń sýbektileriniń báriniń áreketiniń zańdylyǵyn qamtamasyz etý úshin engizildi. Bul qaǵıdattar beıbit jınalystardyń uıymdastyrýshylary men qatysýshylaryna ǵana emes, jergilikti atqarýshy organdar men quqyq qorǵaý organdaryna da qatysty», - dedi Danııar Esın OKQ-da ótken baspasóz máslıhatynda.

Ol sonymen qatar zańda engizilgen uǵymdyq apparat týraly da sóz qozǵady.

«Burynǵy zańmananyń kemshilikteriniń biri – beıbit jınalystar formasynyń naqty reglamentiniń bolmaýy edi. Zańǵa uǵymdyq apparattardy engizý – beıbit jınalystar, mıtıngiler, demonstratsııalar, sherýler men pıket sekildi negizgi túsinikterdi qurylymdap, olardyń ara-jigin ajyratýǵa múmkindik berdi», - dedi Danııar Esın.