Beıbit jınalystar týraly zańnyń artyqshylyǵy da, kemshiligi de is júzinde kórinedi – mınıstrlik

NUR-SULTAN. QazAqparat – Beıbit jınalystar týraly zań normalarynyń is júzinde artyqshylyǵy da, kemshiligi de kórinedi. Memleket basshysy qol qoıǵan beıbit jınalystar týraly zańǵa qatysty Aqparat jáne qoǵamdyq damý vıtse-mınıstri Danııar Esın osylaı dedi, dep habarlaıdy QazAqparat tilshisi.

«Beıbit jınalystardy uıymdastyrý jáne oǵan qatysý quqyǵy azamattarǵa da, uıymdarǵa da berilgen. Ár adamnyń únine qulaq asqymyz keledi. Sonymen birge beıbit jınalystar týraly zańnamany qazir qalyptasqan jaǵdaıdan, quqyq qoldaný tájirıbesinen, saıası mádenıet pen dástúrden, saıası tanymnan bóle jaryp qarastyra almaıtynymyzdy túsinýimiz kerek», - dedi Danııar Esın OKQ-da ótken baspasóz máslıhatynda.

Vıtse-mınıstrdiń aıtýynsha kez kelgen zań tiri aǵza sekildi.

«Ómir bir orynda turmaıdy. Turaqty damý qalpynda. Beıbit jınalystar týraly zań normalarynyń is júzinde artyqshylyǵy da, kemshiligi de, sonymen qatar kem-ketikti joıý joly da kórinedi», - deıdi Danııar Esın.

Sonymen qatar, mınıstrlik ókili zań boıynsha jumys júrgizgen jumys tobynyń múshelerine, Parlament depýtattaryna, azamattyq qoǵam men Ulttyq qoǵamdyq senim keńesiniń múshelerine, quqyq qorǵaý uıymdarynyń ókilderine alǵysyn bildirdi.