Beıbit jınalystar týraly zań mıtıng mádenıetin qalyptastyrady - sarapshy

NUR-SULTAN. QazAqparat - Saılaýaldy baǵdarlamasynda Qasym-Jomart Toqaev óziniń basqarýshylyq saıasatynyń negizi retinde «Sabaqtastyq. Ádildik. Órleý» ustanymdaryn naqty aıqyndaǵan bolatyn. Búginde bul ustanymdar memleket basshysynyń saıası jáne áleýmettik-ekonomıkalyq salalardaǵy alǵa qoıǵan reformalarynyń negizi bolyp tabylady.

Koronavırýstyq pandemııa jaǵdaıynda, onyń álemdegi ulttyq ekonomıkalarǵa tıgizetin saldary turǵysyndaǵy barynsha ózekti másele – ekonomıkany ári qaraı damytýǵa nazar aýdara otyryp, Memleket basshysy ekonomıkalyq damý men áleýmettik-saıası ómirdi jańǵyrtý protsesteri sınergııasynyń mańyzdylyǵyn atap ótti. Ekonomıkalyq ósýdiń jańa sapasyna qol jetkizý áleýmettik-saıası júıedegi ilgerileý jaǵdaıynda oryn alýy tıis.

Zańnamany jetildirý, atap aıtqanda, búgin Memleket basshysy qol qoıǵan «Qazaqstan Respýblıkasyndaǵy beıbit jınalystardy uıymdastyrý jáne ótkizý tártibi týraly» Zań eldiń qoǵamdyq-saıası ómirinde mańyzdy ról atqarady, ıaǵnı mıtıngilerdiń jańa mádenıetin qalyptastyrýǵa yqpal etip, qoǵamdyq tártipke zııan keltirmeı qazaqstandyqtardyń azamattyq belsendiligin tanytýy úshin jaǵdaı jasaıdy.

Jańa zań tujyrymdamalyq apparatty naqtylap, negizgi uǵymdardy retteıtinin atap ótken jón. Bul zańnyń durys túsindirilýine múmkindik beredi. Bir aıta keterligi, 1995 jylǵy «Qazaqstan Respýblıkasynda beıbit jınalystar, mıtıngiler, sherýler, pıketter men demonstratsııalar uıymdastyrý jáne ótkizý týraly» zańda tujyrymdamalyq apparat bolǵan joq.

Eger burynǵy zań beıbit jınalystardy uıymdastyrýdy jáne ótkizýdi aldyn ala ruqsat alý negizinde múmkin dep tanysa, búgin Memleket basshysy qol qoıǵan Zań beıbit jınalystardy uıymdastyrýdyń jáne ótkizýdiń habarlamalyq jáne ótinish berý júıesin qarastyrady. Sońǵy jańartýlarǵa sáıkes, pıketter, jınalystar, mıtıngilerdi uıymdastyrý jáne ótkizýde habarlamalar júıesi, al demonstratsııalar, sherýler uıymdastyrylǵan jaǵdaıda ótinish berý júıesi engizildi.

Búgin qol qoıylǵan Zańda beıbit jınalystardy uıymdastyrýshy men qatysýshynyń quqyqtary men mindetteri tolyqqandy qarastyrylǵan. Beıbit jınalystardy uıymdastyrýshy nemese uıymdastyrýshynyń ókili bolmaǵan jaǵdaıda ótkizýge jol berilmeıdi.

Jalpy alǵanda, zańnyń qabyldanýy Ulttyq qoǵamdyq senim keńesi deńgeıinde bastama retinde kóterilgen jáne el Prezıdentiniń qoldaýymen júzege asyrylǵan saıası reformalar paketindegi mańyzdy taraýlardyń biri boldy.

Karımova Janna,

Qazaqstan Respýblıkasy Prezıdentiniń janyndaǵy QSZI-dyń Áleýmettik-ekonomıkalyq zertteýler bóliminiń basshysy