Beıbit Ystybaev úlken sporttan ketti
ASTANA. QazAqparat - Qazaq kúresinen Azııa chempıony, álem chempıony jáne 3 dúrkin «Qazaqstan barysy» atanǵan Beıbit Ystybaev úlken sportpen qosh aıtysty, dep habarlaıdy 24.kz.
Budan bylaı jambyldyq palýan óz izbasarlaryn daıyndaýmen aınalyspaq. Qazir Beıbit Ystybaev óńirdegi jekpe-jek sport klýbynyń dırektory qyzmetine taǵaıyndaldy. Buǵan qosa ulttyq kúresimizdi halyqaralyq deńgeıde tanytyp, odan ári damytýǵa da qoldan kelgenshe óz úlesin qospaq. Máselen, osydan birer kún buryn Astanada ótken álem chempıonatynda ol uıymdastyrý komıtetiniń ókili atanyp, tóreliktiń ádil ótýine jaýapty boldy.
«Men sporttan ketip, qazir jumysqa bardym. Jospar - palýandar shyǵarý, myqty-myqty, qazaqtyń kók baıraǵyn jelbiretetin. Ol árbir qazaq azamatynyń qolynan keledi. Biraq oıatý kerek sony. Qudaı qalasa, jumys isteımiz. Kóp sóılemeı, az sóıleıtin adambyz. Sondyqtan nátıjesi bolady dep oılaımyn»,-dedi «Qazaqstan barysy» týrnıriniń 3 dúrkin jeńimpazy Beıbit Ystybaev.
