Beıbit Ystybaev «Qazaqstan Barysy» týrnıriniń úsh dúrkin chempıony atandy!
ASTANA. QazAqparat - Astanada tórinde Ult Kóshbasshysy - Qazaqstan Respýblıkasynyń Prezıdenti Nursultan Ábishuly Nazarbaevtyń júldesi úshin «Qazaqstan Barysy-2016» respýblıkalyq týrnıri óz máresine jetti.
Fınalda beldesken Jumanazar Ersultanovtan aılasyn asyrǵan Beıbit Ystybaev «Qazaqstan Barysy» týrnıriniń úsh dúrkin chempıony atandy! Beıbit osyǵan deıin 2012 jáne 2015 jyly «Qazaqstan Barysy» ataǵyna qol jetkizgen bolatyn. Kúmis belbeýdi ıelengen Ońtústik Qazaqstan oblysynyń balýany Jumanazardyń enshisinde osyǵan deıin «Qazaqstan Barysy» týrnıriniń qola belbeýi bar. Al úshinshi oryn alǵan jambyldyq Aıbol Aıtbek bıyl birinshi ret júldege ıelik etip otyr.
Esterińizge sala keteıik, 1-shi oryn alǵan Ystybaevqa 25 000 000 teńge, altyn taıtuıaq jáne Astanadan bir bólmeli páter berildi. Ekinshi oryn alǵan Ersultanovqa 5 500 000 teńge, úshinshi oryn alǵan aıbolǵa 1 800 000 teńge kóleminde syılyq tabystaldy.
