Beıbit Ystybaev - «Qazaqstan Barysy-2015» týrnıriniń jeńimpazy
ASTANA. QazAqparat - Beıbit Ystybaev 2015 jylǵy «Qazaqstan barysy» atandy. Ol Astanada ótip jatqan Ult kóshbasshysy - Qazaqstan Respýblıkasynyń Prezıdenti N.Á.Nazarbaevtyń júldesi úshin qazaq kúresinen «Qazaqstan Barysy» V respýblıkalyq týrnırinde jeńimpaz boldy. Ol osylaısha «Qazaqstan Barysy» jeńimpazy atanyp, altyn belbeýin ıelendi.
Aqtyq aıqasta «Taraz arlany» laqap atymen shyǵyp júrgen Beıbit Ystybaev «Syr arlany» Rýslan Ábdirazaqovpen beldesken edi. Eki apaıtós palýan birazǵa deıin bir-birin eńsere almady. Alaıda, upaı sanymen Beıbit Ystybaev jeńiske jetti. Aıta keterligi, 2012 jyly «Qazaqstan barysy» atanǵan Beıbit Ystybaev araǵa úsh jyl salyp sol jetistigin qaıtalady. Osylaısha, qazaq kúresinen týrnırdi eki márte jeńip alǵan bir ǵana barys ol - Beıbit Ystybaev bolyp otyr. «Qazaqstan Barysy-2015» V respýblıkalyq týrnıriniń jeńimpazy B. Ystybaevqa 150 myń AQSh dollary berildi. Onyń jattyqtyrýshysy Eldos Dalabaı 20 myń dollar syı aldy. Aıta keteıik, jeńimpazǵa «Qazaqstan barysy» júldesin «Samuryq Qazyna» qorynyń basqarma tóraǵasy Ómirzaq Shókeev pen Astana qalasynyń ákimi Ádilbek Jaqsybekov tabys etti.
Al kúmis júldeger Rýslan Ábdirazaqov 30 myń AQSh dollaryn alsa, qolany ıelengen palýan Ǵanı Seıdildaev 10 myń AQSh dollaryn aldy. Aıta keterligi, «Jeńiske jigeri» úshin arnaıy júldeni tamasha tartysty beldesý kórsetken Nurym Sálimgerev ıelenip, oǵan «Samuryq-Qazyna» qorynan avtokólik syılandy.
Aıtýly dodany QR Prezıdenti Nursultan Nazarbaev tamashalaǵan bolatyn. Bul týrnırdi Qazaqstannyń ulttyq arnasy men «Kazsport», sondaı-aq Túrkııanyń «TRT» arnasy jáne Reseıdiń «Boets» arnasy da tikeleı efırde taratty.
