Beıbit Shúmenovtiń qarsylasy Djýnıor Raıt bolady
ASTANA. QazAqparat - Jartylaı aýyr salmaqta ýaqytsha álem chempıony tıtýlyn alǵash ret qorǵaıtyn qazaqstandyq boksshy Beıbit Shúmenovtiń (16-2, 10 KO) qarsylasynyń esimi belgili boldy, dep jazady Sports.kz.
Senbi kúni Las-Vegastaǵy The Cosmopolitan arenasynda Shúmenov rıngte birinshi aýyr salmaqta shyǵyp júrgen amerıkalyq boksshy Djýnıor Raıtpen kezdesedi. Sondaı-aq RVS boks shoýynyń aıasynda Vanes Martırosıan men Erıslandı Lara jáne Jermall Charlo - Ostın Traýt judyryqtasady.
Eske sala keteıik, Beıbit Shúmenov sońǵy jekpe-jegin ótken jyldyń shilde aıynda ótkizdi. Jeltoqsanda ol Kshıshtof Vlodarchıkpen judyryqtasýy tıis edi, alaıda jaraqaty saldarynan bul jekpe-jekten bas tartýǵa májbúr boldy.
