Beıbit Shúmenov jekpe-jegin qaıdan kórýge bolady

ASTANA. QazAqparat - «Qazsport» telearnasy 7 shilde kúni elordada ótetin kásipqoı boks keshin tikeleı efırden kórsetedi. Bul týraly búgin Ortalyq kommýnıkatsııalar qyzmetindegi brıfıngte «Qazsport» telearnasynyń dırektory Pavel Tsybýlın aıtty, dep habarlaıdy QazAqparat tilshisi.

«Mereke kúnderi «Qazaqstan» jáne «Qazsport» telearnalary ádettegideı fýtboldan álem chempıonatyn tikeleı efırden kórsetýin jalǵastyrady. Onyń aldynda arnaıy stýdııalyq baǵdarlama shyǵarylyp, oǵan fýtbolshylardy, jattyqtyrýshylardy, blogerlerdi, kıno akterler men rejısserlerdi qonaqqa shaqyramyz», - dedi ol.

Onyń aıtýynsha, erteń «Uly dala rýhy» festıval bastalady. Qyrkúıek aıyna deıin jalǵasatyn shara elimizdiń barlyq aýmaǵynda ótkiziledi. Festıvaldiń resmı ashylý rásimi «Qazmedıa ortalyǵynyń» kıno-kontsert zalynda ótedi.

«7 shilde kúni Barys arenada Beıbit Shúmenovtiń Hıznı Altynkaıamen tıtýldyq jekpe-jegi ótedi. Boks keshi aıasynda 11 kezdesý bolady. Onyń segizin tikeleı efırden kórsetemiz. Tikeleı kórsetilim «Qazaqstan» jáne «Qazsport» telearnalarynda saǵat 14:00-de bir mezette bastalady. Beıbittiń jekpe-jegi jaqyndaǵan kezde halyqaralyq taratýǵa shyǵyp, sıgnaldy álemniń túrli elderine beremiz. Jalpy, jekpe-jekter keshki saǵat 21:00-ge deıin jalǵasqanymen biz 19-00-ge deıin ǵana tikeleı efırde bolamyz. Sebebi bizdiń fýtboldan álem chempıonatyn kórsetý jónindegi halyqaralyq mindettememiz bar. Tikeleı efırge kirmeı qalǵan jekpe-jekterdi fýtboldan keıin kórsetemiz. Sharshy alańǵa 11 qazaqstandyq boksshy shyǵady jáne barlyǵy da jeńiske jetedi dep senemiz», - dedi Pavel Tsybýlın.