Beıbit Shúmenov WBA nusqasy boıynsha chempıondyq ataǵyn qorǵap shyqty
ALMATY. Shildeniń 26-sy. QazAqparat /Erlik Erjanuly/ - Shildeniń 23-i kúni AQSh-tyń Kalıfornııa shtatynyń Lemýr qalasynda Beıbit Shúmenov Búkilálemdik boks qaýymdastyǵynyń (WBA) nusqasy boıynsha Álem chempıony ataǵyn sátti qorǵap shyqty, dep habarlaıdy QazAqparat.
Beıbittiń bul jolǵy qarsylasy 22 kezdesý ótkizip, onyń 12-sin nokaýtpen aıaqtaǵan Búkilálemdik boks qaýymdastyǵynyń qurlyqaralyq chempıony ýkraındyq Vıacheslav Ýzelkov bolǵan. Kóptegen sport mamandary bul kezdesýdi asa tájirıbeli V. Ýzelkovtyń jeńisimen aıaqtalady dep boljam jasaǵan edi. Buǵan deıin birde-bir ret jeńilis taýyp kórmegen Vıacheslav Beıbitti moıyndaýǵa májbúr boldy. 12 raýndyq jekpe-jek 118:108, 118:108, jáne 117:109 esebimen Álem chempıonynyń paıdasyna sheshildi. Bul ataqty ol qańtardyń 29-y kúni AQSh-tyń Nevada shtatyndaǵy Las-Vegas qalasynda ıspandyq Gabrıel Kampılomen ótken qarymta kezdesýde jeńip alǵan bolatyn. Al ol ony 2009 jyly maýsymnyń 20-sy kúni Argentınanyń Santa-Fe qalasynda Ýgo Garaımen bolǵan kezdesýde ıelengen edi.
1983 jyly tamyzdyń 19-ynda dúnıege kelgen Beıbittiń bul kásipqoı bokstaǵy 10-shy jekpe-jegi boldy. Qazirgi tańda onyń qorjynynda Búkilálemdik boks qaýymdastyǵynyń Azııa-Tynyq muhıt aımaǵynyń (WBO Asia Pacific), Búkilálemdik boks keńesiniń Azııa boks keńesiniń (WBC Asian Boxing Council), Panazııalyq boks qaýymdastyǵynyń (RAVA) chempıony jáne Búkilálemdik boks qaýymdastyǵynyń Álem chempıony belbeýi bar.
