Beıbit Shúmenov Las-Vegasta Búkilálemdik boks qaýymdastyǵynyń (WBA) nusqasy boıynsha Álem chempıony ataǵy úshin qarymta kezdesý ótkizedi
ALMATY. Qańtardyń 15-i. QazAqparat /Erlik Erjanuly/ - Qańtardyń 29-y kúni AQSh-tyń Nevada shtatyndaǵy Las-Vegas qalasynda Búkilálemdik boks qaýymdastyǵynyń Álem chempıony ataǵy úshin qazaqstandyq Beıbit Shúmenov pen ıspandyq Gabrıel Kampılo arasynda qarymta kezdesý ótedi,
dep habarlaıdy QazAqparat.
79,4 keli salmaqtaǵy baq synaıtyn G. Kampılo bul ataqty maýsymnyń 20-sy kúni Argentınanyń Santa-Fe qalasynda alań qojaıyny Ýgo Garaıdy (114:115, 113:114, 114:114) upaı sanymen utyp jeńip alǵan bolatyn. «Kórikti» degen búrkenshik aty bar solaqaı bul boksshy 19 ret saıysqa túsip, ekeýinde ǵana jeńilistiń aşy dámin tatty. 1978 jyly aqpannyń 9-ynda Ispanııanyń Madrıd qalasynda dúnıege kelgen Gabrıelb Kampılo kásipqoı bokstaǵy alǵashqy jekpe-jegin 2002 jyly aqpannyń 9-ynda ótkizgen bolatyn. WBA tujyrymy boıynsha orta salmaqtaǵy Álem chempıony ataǵyn tamyzdyń 15-i kúni Astanada qorǵaǵan ol Beıbit Shúmenovti upaı sanymen utqan bolatyn. Bul kezdesýden keıin Beıbittiń advokattary ıspandyqtyń ruqsat etilmegen preperattardy qoldanǵandyǵy týraly sotqa shaǵym túsirgen bolatyn. Jyl sońyna qaraı Búkilálemdik boks qaýymdastyǵy aqpannyń 29-yna deıin tıtýldyq qarymta kezdesý ótkizý jóninde óz sheshimin jarııalady. Sondaı-aq boksshylar bir-birine taqqan aıyptaýlarynan bas tartyp, aǵaıyndy Beıbit pen Shyńǵys Shúmenovterdiń "KZ Event Productions" kompanııasy men "Golden Boy Promotions" kompanııasy ózara kelisimge keldi.
AQSh-tyń Las-Vegas qalasyndaǵy bul týrnırdi aǵaıyndy Beıbit pen Shyńǵys Shúmenovterdiń "KZ Event Productions" kompanııasy uıymdastyryp otyr. 1983 jyly tamyzdyń 19-ynda dúnıege kelgen Beıbit áýesqoı boksta Azııa birinshiliginiń jeńimpazy, Afrıka-Azııa oıyndarynyń kúmis júldegeri atanyp, 2004 jylǵy Afına olımpıadasyna qatysqan bolatyn. Kásipqoı boksta 8 jekpe-jek ótkizip bireýinde ǵana jeńilis tapqan qazaqstandyq bylǵary qolǵap sheberi buǵan deıin Búkilálemdik boks qaýymdastyǵynyń Azııa-Tynyq muhıt aımaǵynyń (WBO Asia Pacific) jáne Búkilálemdik boks keńesiniń Azııa boks keńesiniń (WBC Asian Boxing Council), Panazııalyq boks qaýymdastyǵynyń (RAVA) chempıony ataqtaryn jeńip alǵan bolatyn.
