Beıbit Shúmenov Golovkınmen birge jattyǵatyn chempıonmen aıqasady

ASTANA. QazAqparat - Búgin Panamada WBA (Regular) tujyrymy boıynsha birinshi aýyr salmaqtaǵy álem chempıony, qazaqstandyq boksshy Beıbit Shúmenovtiń (18-2, 12KO) WBA-nyń osy kategorııadaǵy «ýaqytsha» chempıony, frantsııalyq Arsen Gýlamırıanmen (24-0, 16KO) jekpe-jegi boıynsha promoýterlik saýda-sattyq ótti. Bul týraly «Qazaqstannyń kásipqoı boksy» áleýmettik jelide jazdy, dep habarlaıdy QazAqparat.

Saýda-sattyqta 821 myń AQSh dollaryn usynǵan Shúmenovtiń promoýteri Don Kıng jeńiske jetti. Bul, Gýlamırıan usynǵan taraptyń somasynan 200 myńǵa kóp. WBA erejesi boıynsha, syıaqy Shúmenovtiń paıdasyna 55-ke 45 paıyzdyq qatynasta úlestiriledi. Osylaısha, Beıbit bul aıqas úshin 451 550 AQSh dollaryn, al onyń qarsylasy - 369 450 dollar alady. Saýdanyń eń tómengi mólsherlemesi 200 myń dollar boldy.

Boxingscene.com-nyń málimetinshe, jekpe-jek kelisimshartyna saýda-sattyq aıaqtalǵan sátten 14 kúnniń ishinde qol qoıylýy tıis. Ol 15 sáýir kúni Monte-Karloda, 30 sáýir kúni Qazaqstanda nemese 13 mamyr kúni Nıý-Iork qalasynda ótýi múmkin.

Atap óteıik, Arsen Gýlamırıan qazaqstandyq boksshylar Gennadıı Golovkın, Álı Ahmedov jáne Rýslan Mádıev jattyǵatyn Bıg Berda (Kalıfornııa shtaty, AQSh) daıyndalyp júr.