Beıbit Shúmenov dámhanadaǵy oqıǵanyń qalaı bolǵanyn aıtyp berdi
ASTANA. QazAqparat – Qazaqstandyq boksshy Beıbit Shúmenov áleýmettik jelide taraǵan vıdeodaǵy janjaldyń mán-jaıyn túsindirdi, dep habarlaıdy QazAqparat tilshisi.
«BAQ jáne áleýmettik jelilerde taraǵan maǵan qatysty vıdeo boıynsha jaǵdaı bylaı boldy. Oqıǵanyń bolǵany ras, biraq taraǵan vıdeonyń rakýrsy meniń abyroıyma keri áserin tıgizdi. Oqyrmandar istiń mán-jaıyna kóz jetkizbeı jatyp maǵan til tıgizip, túrli jaǵymsyz pikirler jaza bastady. Ózderińiz biletindeı, aqparat ǵasyrynda kez kelgen adamdy jaman jaǵynan kórsetýge bolady. Sondyqtan túsinispeýshiliktiń aldyn alý úshin bárin ózim a«ıtyp bereıin», - dep jazdy Beıbit Shúmenov Instagram paraqshasynda.
Odan ári boksshy oqıǵanyń qalaı bastalǵanyna toqtaldy.
«Sol kúni 8 jasar ulym balalar alańynda oınap jatty, ulymdy basqa bala arqasynan ura bastaǵan. Ne úshin urǵanyn túsinbeı qalǵan balam árirek baryp oınaǵan. Sálden keıin álgi bala ulymdy taǵy urýǵa tyrysqan. Sodan soń vıdeodaǵy er adam balany alyp ketti. Ulymnyń arqasy qyzaryp ketken jáne syzat túsken. Er adamǵa baryp,»meniń balamdy urǵan sizdiń ulyńyz ba?» dep suradym. Ol maǵan agerssıvti túrde «Iá, urdy, ne bolypty, maǵan ne isteı alasyń?» dep jaýap berdi», - deıdi ol.
Sportshynyń aıtýynsha, vıdeodaǵy er adam zardap shekpegen.
«Onyń jeńil nemese ortasha dene jaraqatyn almaǵanyn sot ekspertızasy rastap otyr. Qazir bolǵan oqıǵaǵa núkte qoıyldy. Meni pıar úshin dep aıyptaǵysy keletinderge aıtarym, maǵan eshqandaı pıar kerek emes. Teris áreketterge qatysqym kelmeıdi. Men úshin adam bolyp qalý mańyzdy. Ómirde qatelikterge jol bermeý jáne beıbitshilik pen kelisimde tynysh ómir súrý úshin ózimdi rýhanı turǵydan tárbıeleımin», - dep túsindirdi Beıbit Shúmenov.
Aıta keteıik, buǵan deıin qolynda balasy bar er adamǵa judyryq ala júgirgen Beıbit Shúmenovtiń qatań jazaǵa tartylatyny habarlandy.
Keıin Sport jáne dene shynyqtyrý isteri komıtetiniń basshysy boksshy Beıbit Shúmenovtiń kisi urý áreketine pikir bildirdi.
