Beıbit Shúmenov chempıondyq ataǵyn qorǵaýǵa mindetteldi

NUR-SULTAN. QazAqparat - Búkilálemdik boks qaýymdastyǵy birinshi aýyr salmaqtaǵy uıymnyń «qarapaıym» chempıony qazaqstandyq Beıbit Shúmenov pen (18-2, 12KO) belgııalyq úmitker Rııad Merhı (29-1, 24KO) arasyndaǵy jekpe-jekti taǵaıyndady, dep habarlaıdy QazAqparat tilshisi.

VKontakte áleýmettik jelisindegi Qazaqstannyń kásipqoı boks paraqshasynda jarııalanǵan aqparatqa sáıkes, WBA eki tarapty da ózderiniń erejesine oraı boksshy chempıon bolǵannan keıin árbir 9 aıda resmı úmitkerge qarsy ataǵyn qorǵaýǵa mindetti ekendigin habarlaǵan. Al Beıbit Shúmenov 2018 jyldyń 7 shildesinde WBA Regular belbeýin jeńip alǵan edi jáne 2019 jyldyń 6 sáýirinde ony mindetti túrde qorǵaýy tıis bolatyn. Osylaısha, qazaqstadyq belbeýin qorǵaý jekpe-jegin 1 jylǵa keshiktirip otyr. Sondyqtan qazaqstandyq boksshy «ýaqytsha» chempıon ári resmı úmitker sanalatyn Merhımen tez arada jekpe-jekke shyǵýy tıis.

Shúmenov pen Merhı komandasynda kelissóz ótkizýge 30 kún bar. Merzim 2020 jyldyń 31 jeltoqsanynda aıaqtalady. Eger atalǵan merzim ishinde taraptar ýaǵdalastyqqa qol jetkizbese nemese taraptardyń biri kelisimshartqa qol qoıýdan bas tartsa, onda WBA jekpe-jekti promoýterlik saýda-sattyqqa shyǵarady.

Esterińizge sala ketsek, Beıbit Shúmenov sońǵy jekpe-jegin 2018 jyldyń shildesinde Qazaqstanda ótkizip, onda túrik boksshysy Hıznı Altýnkaıdy nokaýtpen jeńgen bolatyn. Al Merhı osy jyldyń qazaq aıynda Belgııanyń Sharlerýa qalasynda sharshy alańǵa shyǵyp, jeńilip kórmegen vengerlik Imre Sellony (24-1, 16KO) 7-raýndta nokaýtqa jibergen edi.