Beıbit Shúmenov Búkilálemdik boks qaýymdastyǵynyń (WBA) nusqasy boıynsha Álem chempıony atandy
ALMATY. Qańtardyń 30-y. QazAqparat /Erlik Erjanuly/ - Keshe AQSh-tyń Nevada shtatyndaǵy Las-Vegas qalasynda qarymta kezdesý ótkizgen kásipqoı boksshy Beıbit Shúmenov Búkilálemdik boks qaýymdastyǵynyń nusqasy Álem chempıony atandy,
dep habarlaıdy QazAqparat.
12 raýndtyq jekpe-jekte Beıbit Shúmenov ıspandyq Gabrıel Kampılony 117-111, 115-113, 117-111 esebimen utty. G. Kampılo bul ataqty 2009 jyly maýsymnyń 20-sy kúni Argentınanyń Santa-Fe qalasynda Ýgo Garaımen bolǵan kezdesýde upaı sanymen (114:115, 113:114, 114:114) jeńip alǵan bolatyn. Al óz ataǵyn tamyzdyń 15-i kúni Astanada qorǵaǵan «Kórikti» degen búrkenshik aty bar bul boksshyǵa Beıbit Shúmenov upaı sany boıynsha utylǵan bolatyn. 1978 jyly aqpannyń 9-ynda Ispanııanyń Madrıd qalasynda dúnıege kelgen Gabrıel kásipqoı bokstaǵy alǵashqy jekpe-jegin 2002 jyly aqpannyń 9-ynda ótkizgen bolatyn. Osy ýaqyttyń ishinde ol 19 kezdesý ótkizip, onyń ekeýinde jeńilistiń aşy dámin tatty. Al 1983 jyly tamyzdyń 19-ynda dúnıege kelgen Beıbit kásipqoı bokstaǵy 9 kezdesýdiń 8-in nokaýtpen jeńip, tek sońǵy jekpe-jekte ǵana qarsylasyna ese jibergen edi. Endi onyń qarymtasyn qaıtardy. Buǵan deıin Búkilálemdik boks qaýymdastyǵynyń Azııa-Tynyq muhıt aımaǵynyń (WBO Asia Pacific) jáne Búkilálemdik boks keńesiniń Azııa boks keńesiniń (WBC Asian Boxing Council), Panazııalyq boks qaýymdastyǵynyń (RAVA) chempıony atanǵan Beıbittiń qorjyny bul joly Búkilálemdik boks qaýymdastyǵynyń Álem chempıonynyń altyn belbeýimen tolyqty.
