Beıbit Shúmenov: Astananyń 20 jyldyǵyna áserli boks keshin syılaýǵa daıynmyn
7 shilde kúni elordada kásipqoı boksshy Beıbit Shúmenov WBA-diń birinshi aýyr salmaqtaǵy álem chempıony ataǵy úshin túrkııalyq Hıznı Altynkaıamen qolǵap túıistiredi. Boksshy jekpe-jegine oraı baspasóz máslıhatyn ótkizdi.
«Alǵan jaraqatyma baılanysty eki jyldaı sporttan qol úzgen bolatynmyn. Qazir tolyq qalyptasyp arenaǵa qaıta shyǵýǵa ázirmin. Astana kúni merekesine sáıkes kelgen básekemde qala turǵyndary men qonaqtaryna áserli boks keshin syılaýǵa daıynmyn. Daıyndyqqa kelsem, barlyǵy 114 raýnd jasadym, onyń ishinde brazılııalyq jáne ırlandııalyq boksshylarmen eki sparrıng partııasyn ótkizdim. Bas bapkerim kýbalyq Ismaıl Salas óz isiniń sheberi, kásibı qyzmetinde 19 álemdik boks chempıonyn daıyndap shyǵardy. Qarsylasym Altynkaıanyńda bokstaǵy jetistigi aýyz toltyryp aıtarlyqtaı, bul meniń daıyndyqty kúsheıtýime óz áserin tıgizdi. Endigi suraıtynym maǵan jáne bizdiń komandamyzǵa qoldaý kórsetińizder, halyqtyń qoldaýy bizge dem beredi», dedi Beıbit Shúmenov.
Aıtýly boks básekesine WBA-diń barlyq basshylyǵy - uıym prezıdenti Jılberto Hesýs Mendosa, vıtse-prezıdent Hose Olıver, uıym dırektorlary Djordje Martınes, Karlos Chaves, Marıana Borısova Astanaǵa keledi.
WBA atynan rıngtegi referı Tonı Ýıks bolady, tóreshiler - Leshek ıAnkovıak, Stefano Karozza, Ravel Kardını.
Keshti Maık Markham júrgizedi (ring announcer). Sondaı-aq elordaǵa WBA-diń PR-qyzmeti, teleprodıýserleri men bapkerler quramy keledi, dep kútilýde.
«Jalpy Beıbitpen 3 aı daıyndyq jumysy júrgizildi, sonyń 6 aptasynda birge daıyndyq jasadyq, onyń ishinde 120-ǵa jýyq sparrıng ótkizildi, qysqasyn aıtqanda Beıbit tolyq básekege daıyn dep aıta alamyn»,- dedi boksshynyń bas bapkeri Ismaıl Salas.
Aıta keteıik, Beıbit Shúmenov álem chempıonatynda alǵan jaraqatyna baılanysty kásibı bokstan ýaqytsha qol úzgen bolatyn. Búginde Shúmenov Búkilálemdik boks qaýymdastyǵynyń reıtınginde - ekinshi orynda, al onyń qarsylasy Hıznı Altýnkaıa úshinshi orynda tur.
Aıtýly boks básekesi Astanada 7 shilde kúni «Barys Arena» muz saraıynda, saǵat 13:00-te bolady.