Beıbit Shúmenov Astanada boks mektebin ashady
ASTANA. QazAqparat - Kásibı boksta eki salmaq sanaty boıynsha álem chempıony atanǵan tuńǵysh qazaqstandyq sportshy Beıbit Shúmenov Astanada boks mektebin ashýǵa nıetti, dep habarlaıdy QazAqparat tilshisi.
«Biz Qazaqstanda kásibı boksty damytýdy josparlap otyrmyz. Qazaq balalarynyń álem chempıony atanýyna kómektesip, elimizdiń brendin álemge tanytqymyz keledi. Sondaı-aq jas balalardyń boksty úırenip, tájirıbe jınaqtaýy úshin Astanada boks mektebin ashý josparda bar», - dedi Beıbit Shúmenov Ortalyq kommýnıkatsııalar qyzmetinde ótken baspasóz máslıhatynda.
Boksshy jýrnalıster saýalyna bergen jaýabynda mektepti Astana qalasynda ashatynyn aıtty. Al onyń naqty qaı ýaqytta ashylatynyn aıta almady. Degenmen oǵan 7 jasqa deıingi balalar qabyldanatynyn jetkizdi. Onyń aıtýynsha, joba sátti júzege assa, mundaı mektepter Qazaqstannyń ózge de qalalarynda ashylatyn bolady.
Shúmenov ózin bapker bolýǵa áli erte dep sanaıdy, biraq bilimi men tájirıbesin jas qazaqstandyqtarmen bólisýge daıyn ekenin atap ótti.
«Meniń oıymsha, qazaqstandyqtar kásibı bokstyń qanshalyqty bedeldi ekenin áli túsingen joq. Máselen, Mennı Pakıao kishkentaı ǵana Fılıppınnen shyqqan. 10 jyl buryn Fılıppınniń qaıda ornalasqanyn álem halqy bilgen joq dep oılaımyn. Dál osy boksshynyń arqasynda Fılıppın eli álemge tanyldy. Boksshy álemdik kásibı arenada tanylǵan saıyn, eldiń de abyroıy arta túsedi. Buǵan qol jetkizý úshin meniń kompanııam, bilimim jáne tájirıbem bar. Bapker bolatyn oıym joq, biraq otandastarymnyń álemdik arenada tabysty bolýy úshin tájirıbemmen bólisýge ázirmin», - dedi ol.
Eske sala ketsek, búgin Beıbit Shúmenov uzaq úzilisten keıin úlken sportqa qaıta oralǵanyn málimdedi. Shúmenov - AQSh-tyń Las-Vegas qalasynda promoýterlik lıtsenzııasy bar jalǵyz sheteldik boksshy. Onyń KZ Event Productions, Inc. promoýterlik kompanııasynyń Showtime, ESPN, Fox Sports Network, NBC Sports kanaldarymen aldyn ala kelisimderi bar. Boksshy osyndaı múmkindikterdi paıdalana otyryp, óziniń kásibı mansabyn jalǵastyratynyn jáne otandyq boksshylardyń Qazaqstanda ǵana emes, álemde tanylýy úshin qoldaý bildiretinin jetkizdi.
