Beıbit Shúmenov áreketi úshin jaýap beredi – mınıstr Oralov

ASTANA. QazAqparat – Mádenıet jáne sport mınıstri Ashat Oralov Úkimet otyrysynan keıin kásipqoı boksshy Beıbit Shúmenovtiń aınalasyndaǵy shýǵa qatysty túsinik berdi, dep habarlaıdy QazAqparat tilshisi.

«Shúmenov týraly mynany aıtamyn, qazir quqyq qorǵaý organdary aınalysyp jatyr. Іshki ister mınıstrligi pikir bildirip te qoıdy. Resmı qorytyndydan keıin qosymsha túsinik bildire alamyz. Ol is qazir quqyqtyq alańda qaralyp jatyr. Osyǵan baılanysty birneshe baspasóz habarlamasy da shyqty», - dedi Ashat Oralov.

Vedomstvo basshysy zań aldynda búkil qazaqstandyqtyń quqyǵy men mindeti birdeı ekenin eske saldy.

«Bul – quqyqtyq alań, ár adam kásibine, qyzmetine qaramastan, óz sózi men áreketi úshin jaýap beredi, onyń ústine jeke ómiri bolsa. Sondyqtan ol óz áreketi úshin quqyqtyq alańda jaýap beredi», - dedi mınıstr.

«Beıbit Shúmenovke osy jaǵdaıdan keıin Qazaqstan aýmaǵynda sportpen aınalysýǵa tyıym salyna ma?», - dep surady jýrnalıst.

Ashat Oralov qazir bul ispen quqyq qorǵaý organdary aınalysyp jatqandyqtan ázirge kılige almaıtyndaryn aıtty.

«Quqyq qorǵaý orandarynyń jumysynan keıin, qorytyndysy shyqqannan keıin pikir bildireıik. Sottyń tıisti sheshimi shyǵady, sodan keıin ǵana túsinik bere alamyn. Qazir biz kılige almaımyz», - dedi mınıstr.

Eske salaıyq, sportshy Beıbit Shúmenov memleketaralyq izdeýge jarııalandy. Ol bıylǵy 18 maýsymda Astanadaǵy «Mega Silkway» saýda, oıyn-saýyq ortalyǵynda qolyna bala ustaǵan er adamdy uryp-soqty dep aıyptalyp otyr. Elordanyń Polıtsııa departamenti Qylmystyq kodekstiń 293-baby (buzaqylyq) boıynsha sotqa deıingi tergeý amaldaryn júrgizip jatyr.

Kinási dáleldense ol 5 jylǵa deıin bas bostandyǵynan aıyrylýy múmkin.

Boksshy áleýmettik jelidegi paraqshasy arqyly óz áreketin túsindirmek te boldy.