Beıbit Shúmenov 5 jylǵa deıin bas bostandyǵynan aıyrylýy múmkin
ASTANA. QazAqparat – Іshki ister mınıstrligi elordadaǵy saýda-oıyn-saýyq ortalyǵynda bolǵan buzaqylyq faktisi boıynsha tergeýdi jalǵastyryp jatyr, dep habarlaıdy QazAqparat vedomstvonyń telegram kanalyna silteme jasap.
Astanadaǵy iri saýda oıyn-saýyq ortalyǵynyń fýd-kortynda janjal bolyp, qolynda balasy bar er adamǵa judyryq ala júgirgen adamnyń kásibı boksshy Beıbit Shúmenov ekeni anyqtalǵan edi.
Mınıstrliktiń baspasóz qyzmeti taratqan aqparat boıynsha, oqıǵa 18 maýsymda bolǵan. Astanadaǵy «Mega Silk Way» saýda-oıyn-saýyq ortalyǵyndaǵy kafelerdiń birinde qoǵamdyq tártip buzylyp, kelýshilerdiń biri ekinshisin uryp-soqqan.
Qazirgi ýaqytta osy fakt boıynsha QR QK-niń 293-babymen (Buzaqylyq) sotqa deıingi tergeý bastaldy, ol 5 jylǵa deıin bas bostandyǵynan aıyrýdy kózdeıdi.
Іshki ister organdary barlyq qajetti jedel-tergeý is-sharalary júrgizilip jatqanyn, olardyń nátıjeleri boıynsha quqyqtyq baǵa beriletinin málim etti.
Eske salsaq, Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Erbol Myrzabosynov boksshy Beıbit Shúmenovtiń qoǵamdyq orynda kisini urý áreketine pikir bildirdi. Sondaı-aq, Bala quqyqtary jónindegi ýákil Dınara Zákıeva boksshy Beıbit Shúmenov qatysqan tóbeles boıynsha Іshki ister mınıstrligine júgingenin málim etti.
Buǵan deıin boksshy áleýmettik jelide taraǵan vıdeodaǵy janjaldyń mán-jaıyn túsindirgen bolatyn.
