Beıbit Nazarov aralas jekpe-jekten halyqaralyq KUNLUN FIGHT 2 CAGE SERIES týrnıriniń jeńimpazy atandy
ALMATY. QazAqparat- Almatyda jańa ǵana Balýan Sholaq atyndaǵy sport saraıynda aralas jekpe-jek boıynsha halyqaralyq «KUNLUN FIGHT 2 CAGE SERIES» týrnıriniń negizgi jekpe-jeginde qazaqstandyq saıypqyran Beıbit Nazarov (72 keli) brazılııalyq Brýno Amorım Robınomen kezdesken bolatyn.
Jekpe-jek asa tartysty ótti. Birinshi raýndta Beıbit qarsylasyn uryp qulatyp, soqqynyń astyna alyp edi, biraq bul nátıje bermedi. Úshinshi raýndta tik turyp aıqasý barysynda qarsylasyn baspen soǵýyna baılanysty Beıbitten bir upaı alynyp tastaldy. Jekpe-jek aıaqtalǵan soń, tóreshiler aqyldasa kele ekstra raýnd jarııalady. Kezdesý nátıjesi boıynsha Beıbit Nazarov upaı sanymen jeńiske jetti. Sóıtip, qytaılyq KUNLUN FIGHT federatsııasynyń nusqasy boıynsha Álem chempıony atandy. Buǵan deıingi ótken taǵy bir negizgi jekpe-jek 57 keli salmaq dárejesinde Qazybek Áshimov pen ońtústikkoreıalyq Eong Von Sok arasynda ótti. Jerlesimiz birinshi raýndta qarsylasynyń moınyna qylǵyndyrý ádisin qoldanyp, jeńiske jetti. Sóıtip, qytaılyq KUNLUN FIGHT federatsııasynyń nusqasy boıynsha Álem chempıony atandy.
