Beıbit Mamraev: Latyn álipbıi jobasyna qatysty bir aıda kóp ilgerileý bar
«Osydan bir aı buryn «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaýda latyn qarpiniń alǵashqy nusqasy qarastyrylǵan bolatyn. Sodan beri kóp ózgeristerdi baıqaýǵa bolady. Óıtkeni júzdegen usynystar kelip túsip jatyr, osy oraıda bul usynystardy jumys tobynyń músheleri egjeı-tegjeıli qarastyryp, aptanyń basynda álipbıdiń ekinshi jobasyn tanystyrdy. Árıne, bul nusqa birinshisine qaraǵanda deńgeıi joǵary dep oılaımyn», - deıdi Beıbit Mamraev.
Onyń paıymynsha, Qazaqstanda latyn álipbıine kóshý protsesi qalypty jaǵdaıda júrip jatyr. Sebebi bul baǵyttaǵy sharalar keshendi túrde qamtylýda.
«Atap aıtqanda, osy salany túsinetin ári janashyr mamandardyń barlyǵy ózderiniń usynystaryn berip jatqanyn bilesizder. Jyldyń aıaǵyna deıin tapsyrma boıynsha ýaqyt bar, endi ǵalymdar men mamandar taǵy da budan ary jetildiredi dep oılaımyn. Sondyqtan bul másele keshendi jáne júıeli túrde muqııat qaralýy tıis», - dep túıindedi sózin depýtat.
Budan buryn habarlanǵandaı, bıylǵy 9 qazanda Memleket basshysy Nursultan Nazarbaev memlekettik tildi latyn álipbıine kóshirý jobasy boıynsha jumys tobynyń múshelerin qabyldady. Jıynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵaı standartyny ń jobasy usynyldy.
Esterińizge sala keteıik, bıyl sáýirde «Egemen Qazaqstan» respýblıkalyq gazetinde QR Tuńǵysh Prezıdenti - Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy shyqqan bolatyn. «2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerek. 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisýimiz qajet», - dep atap ótilgen Elbasy maqalasynda.
Foto https://kze.docdat.com
