Beıbit Isabaev JOO jáne kolledj túlekteriniń jumyssyz qalýyna alańdaýly

NUR-SULTAN. QazAqparat – Senator Beıbit Isabaev óziniń depýtattyq saýalynda halyqty jumyspen qamtý salasyna alańdaýshylyq bildirdi. Osy oraıda ol Úkimet basshysy Álıhan Smaıylovtyń atyna saýal joldady, dep habarlaıdy QazAqparat tilshisi.

Onyń aıtýynsha, jumyspen qamtýdaǵy jalpy ósim kórsetkishiniń 60%-y «áleýmettik ekonomıka», ıaǵnı bıýdjetten qarjylanatyn bilim, densaýlyq saqtaý, memlekettik qyzmet salasy t.b. esebinen júzege asýda. Jańa jumys oryndarynyń ashylý barysynda jekemenshik sektordyń úlesi azaıyp otyr.

Senatordyń málimetinshe, jyl saıyn joǵary oqý ornyn, kolledj bitirgen árbir úshinshi jas maman jumyssyz qalýda. Al jumysqa ornalasqandardyń 30%-y óz mamandyqtary boıynsha emes, biliktiligi, jalaqysy tómen jumysqa turady.

Depýtat osyǵan baılanysty Úkimette oryn alǵan problemalardy júıeli túrde sheshý jóninde sharalar qabyldaý mańyzdy dep sanaıdy.

«Elimizde qalyptasqan eńbek naryǵynyń búgingi jaǵdaıyna tereń, jan-jaqty taldaý júrgizý qajet. Jalpy halyq sanynyń, jańa eńbek resýrstarynyń ósý dınamıkasyn elimiz ekonomıka sektorlarynyń ósimmen tikeleı baılanystyra otyryp, aldaǵy 5 jylǵa eńbek resýrstaryna suranystyq boljam jasalýy tıis. Oqý oryndarynyń baǵdarlamalary men standarttaryn osy suranysqa, jumys berýshilerdiń óndiristik daǵdy-talaptaryna saı ázirlengeninde ǵana eńbek naryǵyndaǵy suranys pen usynystyń teńgerimdiligine qol jetedi», - dedi Beıbit Isabaev Senattyń jalpy otyrysynda.

Depýtat sonymen qatar halyqtyń laıyqty jumyspen qamtamasyz etý jáne tabysty arttyrý mindeti barlyq memlekettik organdardyń úılesimdi jáne birlesken jumysy kezinde ǵana júıeli sheshiletinin atap ótti.