Beıbit Atamqulov jyl sońyna deıin tapsyrylatyn jobalardy atady

NUR-SULTAN. QazAqparat – Búgin Úkimet otyrysynda Indýstrııalandyrý kartasy jobalaryn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov jyl sońyna deıin iske qosylatyn jobalardy aıtty, dep habarlaıdy QazAqparat tilshisi.

Jyl sońyna deıin kelesi jobalardy paıdalanýǵa berý josparlanǵan:

Birinshi - Shyǵys Qazaqstan oblysyndaǵy Aqtoǵaı ken baıytý kombınatyn keńeıtý jónindegi joba («KAZ Minerals Aktogay» JShS). Bul sýlfıdti kendi qaıta óńdeý qýatyn jylyna 2 esege, ıaǵnı 50 mln tonnaǵa deıin ulǵaıtýǵa, al mys óndirisin 90%-ǵa arttyryp, jylyna 190 myń tonnaǵa jetkizýge múmkindik beredi.

Ekinshi - Shymkent qalasynda alıýmınıı bankilerin óndirý boıynsha Qazaqstandaǵy alǵashqy joba. Qazir biz jylyna 700 mln alıýmınıı bankilerin ımporttaımyz. Osy jobany iske asyrý tamaq ónerkásibiniń ishki qajettiligin 65%-ǵa (jylyna 500 mln.birlik) qamtamasyz etedi.

Úshinshi - Qaraǵandy oblysynda Saryarqa ferroqorytpa zaýytyn salý jobasy - «Qaz Carbon» JShS (Kaz Karbon). Kásiporyn joǵary sapaly ferroqorytpalar men aglomerat marganetsterin alý úshin ınnovatsııalyq tehnologııalardy paıdalanady. Shyǵarylatyn ónim tolyǵymen eksportqa baǵyttalǵan (AQSh, Japonııa, Koreıa, Túrkııa jáne Eýropa elderi).

«128 jobanyń tolyq qýatyna shyǵýy el ekonomıkasynyń odan ári damýyna oń serpin beredi. Óndiris kólemi shamamen 1 trln teńge. Eksporttyq áleýet 800 mln AQSh dollaryn quraıdy. Aýyldyq jerlerde 5,5 myń, al monoqalalarda (Saran, Ekibastuz jáne Rıdder qalalary) 1,6 myń turaqty jumys ornyn ashý josparlanýda. Qazirgi jaǵdaıda ındýstrııalandyrýdyń jaqsy qarqyny birinshi besjyldyqta berilgen serpinniń arqasynda saqtalyp otyrǵanyn atap ótken jón», - dedi mınıstr.

Budan buryn habarlanǵandaı, bıyl elimizde 1,23 trln teńge bolatyn 128 joba iske qosylady.

Osy baǵytta ınvestıtsııa tartý jaǵynan 2 óńir kósh basynda tur.