Beıbit Atamqulov Joldaý júktegen mindettermen Qaraǵandy oblysynda boldy
ASTANA. QazAqparat - Prezıdent N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń basymdyqty baǵyttaryn halyqqa túsindirý maqsatynda QR Qorǵanys jáne aeroǵarysh ónerkásibi mınıstri Beıbit Atamqulovtyń Qaraǵandy oblysyna sapary ótti, dep habarlady QazAqparatqa vedomstvonyń baspasóz qyzmetinen.
Aqparattyq top is-sapar aıasynda «Saryarqa» AEA-da bolyp, onda «Steel manufacturing» jobasy qurylysynyń barysymen tanysty, sonymen qatar, jylyna 24 myń tonna metallýrgııalyq kremnıı óndiretin kremnıı zaýytynyń óndiristik alańynda - «Taý-Ken Temir» JShS-de boldy.
Odan keıin Elbasy Joldaýynyń negizgi baǵyttaryn túsindirý boıynsha B.Atamqulovtyń eńbek ujymymen kezdesýi ótti.
«Qazaqstan búginde jańa dáýirdiń aldynda tur. Álem barynsha damý ústinde. Adamzat balasy tórtinshi ónerkásiptik revolıýtsııasynyń dáýirine enýde. Bul degenimiz - joǵary bilim men tehnologııalarǵa negizdelgen aıryqsha ındýstrıalızatsııalaý. Osy jaǵdaılarǵa baılanysty Elbasy Qazaqstannyń úshinshi jańǵyrýyn qamtamasyz etý mindetin qoıyp otyr»,- dedi mınıstr.
«Elbasy elimizdiń aldyna aýqymdy mindetterdi qoıyp otyr. Olardy tabysty etip iske asyrý úshin Qazaqstanda, ásirese, Qaraǵandy oblysynda asa qýatty áleýet bar. Óıtkeni, bul jer - barlyq metallýrgııalyq jáne kómir ónerkásibiniń ortalyǵy» -dep atap ótti B. Atamqulov.
Júzdesý sońynda qatysýshylardyń barlyǵy Prezıdenttiń Qazaqstan halqyna Joldaýyn bir kisideı qoldap, Qaraǵandy oblysy qoıylǵan mindetterdi iske asyrýǵa belsendi qatysatyndyǵyn aıtty.
Sonymen qatar, mınıstr Qaraǵandy oblysy ákiminiń turǵyndarmen eseptik kezdesýine qatysty. Onda oblystyń áleýmettik-ekonomıkalyq damýynyń 2016 jylǵy qorytyndylary men 2017 jylǵa arnalǵan josparlary aıtyldy. Oblys basshysy «Nurly jol» memlekettik baǵdarlamasynyń júzege asý barysy týraly tolyqqandy aqparat berdi.
