Beıbit Atamqulov: Jeńil ónerkásipti damytýdyń keshendi jospary ázirlenýde

NUR-SULTAN. QazAqparat – Sáýirde jeńil ónerkásipti damytýdyń keshendi jospary Úkimet qaraýyna engiziledi. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Jeńil ónerkásip boıynsha josparlanǵan naqty kólem ındeksi – 105 paıyz. Toqyma ónimderin óndirý kólemi 6, onyń ishinde maqta-mata ıirim-jibi 50, mata 14, kilem 19, kıim 11, teri 30,4 paıyz ulǵaıady. Bıyl 5,4 mlrd teńgege ıirim-jip, geotekstıl, kıim jáne aıaq kıim shyǵaratyn 5 jobany iske asyrý josparlanyp otyr», - dedi óńdeý ónerkásibin damytý jaıynda baıandaǵan mınıstr.

Onyń atap ótýinshe, mınıstrlik Jeńil ónerkásipti damytýdyń 2025 jylǵa deıingi keshendi josparyn ázirleýge kiristi.

«Onda salany qoldaýǵa baǵyttylǵan júıeli sharalar qarastyrylady. Qujat osy jyldyń sáýir aıynda Úkimettiń qaraýyna engiziledi», - dedi Beıbit Atamqulov.