Beıbit Atamqulov Japonııa jáne Aýǵanstan mınıstrlerimen kezdesti
NUR-SULTAN. QazAqparat - «Ortalyq Azııa + Japonııa» Dıalogy (OAJD) Syrtqy ister mınıstrleriniń 7-shi kezdesýine qatysý sheńberinde Qazaqstan Respýblıkasynyń Syrtqy ister mınıstri Beıbit Atamqulov Japonııa men Aýǵanstan Syrtqy ister mınıstrleri Taro Kono jáne Salahýddın Rabbanımen kezdesti. Bul týraly QazAqparat SІM baspasóz qyzmetine silteme jasap habarlaıdy.
Japon áriptesimen kezdesý barysynda B.Atamqulov japon delegatsııasyn jaqynda jańa ımperator Narýhıtonyń taǵyna otyrýymen jáne «REIVA» («gúldengen álem») jańa dáýiriniń bastalýymen quttyqtady.
Qazaqstan tarapy Ortalyq Azııa men Japonııa formatynda dıalogty ótkizýdiń qajettiligi men mańyzdylyǵyn atap ótti, sebebi bul platforma aımaqtyq kún tártibiniń ózekti máselelerin jáne Japonııamen aımaqaralyq yntymaqtastyqty talqylaý úshin úlken múmkindikterdi usynady.
Taraptar Qazaqstan-Japonııa qatynastarynyń jaı-kúıine qanaǵattanǵandyqtaryn bildirdi. «Qysqa tarıhı kezeń ishinde Qazaqstan men Japonııa arasyndaǵy qarym-qatynas strategııalyq áriptestik deńgeıine kóterildi. Bizdiń el basshylyǵy Japonııamen yntymaqtastyqty damytýǵa erekshe mán beredi», - dedi Qazaqstan SІM basshysy.
Saýda-ekonomıkalyq yntymaqtastyq belsendi damyp keledi, Japonııa - Qazaqstandaǵy eń iri sheteldik ınvestorlardyń sany boıynsha 7-shi orynda, eki jaqty saýdanyń ósýi baıqalady. 2018 jyly taýar aınalymy 2 mlrd. AQSh dollaryna jetti, bul ótken jyldyń sáıkes kezeńimen (1,3 mlrd. dollar) salystyrǵanda 54%-ǵa artty. Qazirgi ýaqytta Qazaqstanda japondyq kapıtaldyń qatysýymen munaı-gaz, metallýrgııa, qarjy, taý-ken ónerkásibi, avtomobılderdi kóterme satý jáne logıstıka sııaqty salalarda jumys isteıtin 70 kásiporyn bar.
Qazaqstan ekonomıkalyq jańǵyrtýdy sátti júzege asyrý úshin qajetti japondyq ınvestıtsııalar men ozyq tehnologııalardy tartýǵa múddeli. Bizdiń elimiz ózara tıimdi birlesken jobalardy júzege asyrý úshin qolaıly jaǵdaılar jasaýǵa daıyn. Taraptar qazaqstan-japon yntymaqtastyǵyn odan ári nyǵaıtý jónindegi jumysty jalǵastyrýǵa kelisti.
Aýǵanstan Syrtqy ister mınıstrliginiń basshysymen eki jaqty yntymaqtastyqtyń negizgi máseleleri talqylanǵan kezdesý dostyq jaǵdaıda ótti.
Qazirgi ýaqytta Aýǵanstannyń saıası ómirinde aldaǵy prezıdenttik saılaýǵa baılanysty óte mańyzdy kezeń. Qazaqstandyq tarap saılaýdyń ádil jáne ymyrasyz kúres, tolyq ashyqtyq pen qaýipsizdik jaǵdaıynda ótkiziletinine, al aýǵan halqy durys tańdaý jasaıtynyna senim bildirdi. «Qazaqstan Aýǵanstandy qaıta qalpyna keltirý boıynsha halyqaralyq mindettemelerin oryndap keledi jáne eldegi jaǵdaıdy tezirek turaqtandyrýǵa múddeli», - dedi QR SІM basshysy.
Qazaqstan men Aýǵanstan arasyndaǵy ekonomıkalyq saladaǵy yntymaqtastyqtyń jaqsy deńgeıi atap ótildi, bunyń dáleli retinde 2018 jyly (520,6 mln) jarty mıllıard AQSh dollarynan astam taýar aınalymy. Saýda-ekonomıkalyq yntymaqtastyq salasyndaǵy negizgi quraldardyń biri - Qazaqstan-Aýǵanstan Úkimetaralyq komıssııasy.
Aýǵanstan qazaqstandyq astyq jáne onyń ónimderiniń dástúrli ımporteri bolyp tabylady. Osyǵan baılanysty Qazaqstan qazaqstandyq taýarlardyń eksportyn arttyrýǵa múddeli jáne otandyq taýarlardy ımporttaýshy qazaqstandyq kompanııalarǵa kómek kórsetýdi surady. Aýǵanstanǵa eksporttaýǵa bolashaǵy bar taýarlar arasynda aýyl sharýashylyǵy jáne qurylys tehnıkasy, akkýmýlıator, generator, qurylys materıaldary, elektr berý jelileri, metall jáne plastıkalyq qubyrlar, shyny jáne t.b.
2019 jyldyń aqpan aıynda qazaqstandyq «Integra Konstrakshn» kompanııasy Aýǵanstandaǵy «Haf - Gerat» temirjol ýchaskesin salý boıynsha tenderdi jeńip aldy. Osyǵan baılanysty Qazaqstan SІM basshysy Aýǵanstan tarapyna bizdiń kompanııamyzdyń osy qurylysqa qatysýǵa jáne osy kompanııanyń qyzmetkerleriniń qaýipsizdigin qamtamasyz etýge daıyn ekendigine alǵysyn bildirdi.
Qazaqstan adam resýrstaryna ınvestıtsııalaýǵa úlken mán beredi jáne joǵary oqý oryndarynda joǵary, tehnıkalyq jáne kásiptik bilim alǵan aýǵan jastary úshin bilim berý baǵdarlamasyn júzege asyrýdy jalǵastyrýda. QR Bilim jáne ǵylym mınıstrligi men AIR Bilim mınıstrligi bakalavrıat baǵdarlamalary boıynsha - 16, magıstratýra - 16 jáne doktorantýrada - 2 stýdent arqyly qazaqstandyq joǵary oqý oryndarynda 30 aýǵan azamatyn daıarlaýdy kózdeıtin Memorandýmǵa qol qoıdy.
