Beıbit Atamqulov TJ kezinde ınternettiń shektelýine qatysty túsinik berdi

ASTANA. QazAqparat - QR Qorǵanys jáne aeroǵarysh ónerkásibi mınıstri Beıbit Atamqulov TJ bolǵan kezde ınternet pen baılanysty shekteý boıynsha Úkimet qaýlysyna túsinik berdi, dep habarlaıdy QazAqparat.

«Bul standartty rásimder jáne olar eń damyǵan elderde de qoldanylady. Búginde ınternet kóptegen elderdiń ulttyq qaýipsizdigi men  qorǵanys qabileti máselelerinde úlken ról oınaıdy. Sebebi tıisti sharalar men operatsııalar kezinde, onyń ishinde áskerı is-qımyldarda paıdalanylatyn jabdyqtar kommýnıkatsııa júıelerimen jumys isteıdi», - túsindirdi mınıstr Májilistiń jalpy otyrysynan keıin tilshilerge bergen jaýabynda.

Osy oraıda, ol qaýipsizdikke qatysty atqarylatyn barlyq qadamdar birinshi kezekte memlekettiń, ulttyq qorǵanystyń múddesine qaraı iske asyrylatynyn qadap aıtty.

Eske salsaq, buǵan deıin Aqparat jáne kommýnıkatsııalar mınıstri Dáýren Abaev tótenshe jaǵdaı kezinde ınternet pen baılanysty buǵattaý quqyǵyna ıe memlekettik organdardy belgileý boıynsha QR Úkimetiniń Qaýlysyna túsinik bergen edi.