Beıbit Atamqulov Tájikstan men Qyrǵyzstanǵa saparmen barady
«18 mamyrda Dýshanbede Syrtqy ister mınıstri Beıbit Atamqulovtyń qatysýymen Ortalyq Azııa elderi men Japonııa syrtqy saıası vedomstvolary basshylarynyń kezekti 7-shi otyrysy ótedi. Kezdesý barysynda «Ortalyq Azııa + Japonııa» dıalogyna qatysýshy elderdiń saýda, ınvestıtsııa, týrızm jáne óńirlik qaýipsizdik salalaryndaǵy yntymaqtastyqty damytý máseleleri talqylanatyn bolady», - dedi resmı ókil.
«Ortalyq Azııa + Japonııa» dıalogy alǵash ret 2004 jyly Japonııanyń bastamasymen shaqyrylǵan bolatyn. Bul formattaǵy yntymaqtastyqtyń negizgi baǵyttaryna saıası jáne zııatkerlik dıalogty, ishki aımaqtyq yntymaqtastyqty damytý, bıznesti kótermeleý, mádenı baılanystardy qoldaý máseleleri kiredi.
Sonymen qatar Beıbit Atamqulovtyń Qyrǵyzstanǵa resmı sapary jáne Shanhaı yntymaqtastyq uıymy men Ujymdyq qaýipsizdik týraly shart uıymynyń Syrtqy ister mınıstrleri keńesiniń otyrystaryna qatysýy josparlanǵan.
«Tájikstanǵa sapardan keıin Beıbit Atamqulovtyń Ortalyq Azııa elderi boıynsha sapary Qyrǵyzstanda jalǵasyn tabady. 19-20 mamyr aralyǵynda onyń Bishkekke resmı sapary ótedi. Sapar barysynda eki eldiń syrtqy saıası vedomstvolary basshylarynyń 2019-2020 jyldarǵa arnalǵan Qazaqstan men Qyrǵyzstannyń Syrtqy ister mınıstrligi arasyndaǵy yntymaqtastyq baǵdarlamasyna qol qoıýy josparlanǵan. Resmı sapar baǵadarlamasy aıaqtalǵannan soń, Beıbit Atamqulov 22 mamyrda Bishkek qalasynda ótetin Shanhaı yntymaqtastyq uıymy men Ujymdyq qaýipsizdik keńesiniń syrtqy ister mınıstrleriniń otyrystaryna qatysady», - dedi Aıbek Smadııarov.