Beıbit Atamqulov sheteldik ınvestıtsııalardyń nege azaıyp ketkenin túsindirdi
NUR-SULTAN. QazAqparat – Qazaqstanda tikeleı sheteldik ınvestıtsııa kólemi tómendedi. Bul týraly QR Prezıdenti Qasym-Jomart Toqaev málimdedi, dep habarlaıdy QazAqparat tilshisi.
«Bıyl tikeleı sheteldik ınvestıtsııa 11,5% azaıdy. Birden aıtaıyn, bul – óte úreıli kórsetkish. Barlyq sala boıynsha tómendeý baıqalady. Bul jóninde Syrtqy ister mınıstri ne aıtady?», - dedi Prezıdent QR Syrtqy ister mınıstri Beıbit Atamqulovqa Úkimettiń keńeıtilgen otyrysynda.
«Osymen úshinshi jyl álemde tikeleı sheteldik ınvestıtsııa qaıtarylyp jatyr. AQSh, Qytaı, EO elderi syndy kóptegen elder dostastyq elderinen óz ınvestıtsııalaryn qaıtaryp jatyr. Elder arasynda básekelestik artty. Іshki máseleler de bar. Úkimet úılestirý keńesin qurdy jáne ony Premer-Mınıstr basqarady. Osymen eki otyrys ótkizdik jáne eń basty másele – sot júıesiniń ashyqtyǵy men ádildigi jáne salyq júıesiniń turaqtylyǵy men senimdiligi bolyp otyr. Kóshi-qon saıasatyn jetildirý qajet. Jabyq esikke ınvestıtsııa kelmeıdi», - dep jaýap berdi Beıbit Atamqulov.
Mınıstrdiń aıtýynsha, Prezıdent eskertpeleri oryndy aıtylǵan.
«Iá, bizdegi eksporttyq joldar kúrdeli. Tranzıt azaıdy. Iran arqyly tranzıt esebinen kóp nárse joǵalttyq. Kaspıı tranzıtiniń baǵasy qymbattady. Biz qaǵazda eseptep kórdik te, endi naqty problemalarmen betpe-bet kelip jatyrmyz. Sizdiń eskertpelerińiz óte oryndy», - dedi mınıstr.
Beıbit Atamqulovtyń aıtýynsha, otandyq ınvestorlar Qazaqstanǵa salynatyn ınvestıtsııalardyń sheshýshi ári mańyzdy quraýshysy bola alady.
