Beıbit Atamqulov Máskeýde Sergeı Lavrovpen kezdesti
MÁSKEÝ. QazAqparat - Qazaqstan Respýblıkasynyń Syrtqy ister mınıstri Beıbit Atamqulov Máskeýde Reseı Federatsııasynyń Syrtqy ister mınıstri Sergeı Lavrovpen kezdesti, dep habarlaıdy QazAqparat mınıstrliktiń baspasóz qyzmetine silteme jasap.
Kezdesý barysynda syrtqy saıası vedomstvolar basshylary saıası jáne ekonomıkalyq salalardaǵy ekijaqty yntymaqtastyqtyń qazirgi ahýaly men keleshegin talqylady, sondaı-aq óńirlik jáne halyqaralyq kún tártibiniń túrli aspektileri boıynsha pikir almasty.
«Suhbattastar Qazaqstan-Reseı qarym-qatynastarynyń dástúrli joǵary deńgeıin belgiledi. B. Atamqulov Prezıdent Nursultan Nazarbaev Qazaqstan halqyna joldaýynda eki eldiń qarym-qatynasyn sıpattaı otyryp, olardy memleketaralyq qarym-qatynastardyń úlgisi ekendigin atap ótti», - delingen habarlamada.
Syrtqy saıasattyń ekonomıkalyq quramdas bóligin nyǵaıtý jónindegi QR Syrtqy ister mınıstrligine júktelgen mindetterdi eskere otyryp, saýda-ınvestıtsııalyq yntymaqtastyq máselelerine, kólik-tranzıt, otyn-energetıka jáne áskerı-tehnıkalyq saladaǵy jaǵdaı men bolashaqqa, sondaı-aq Baıqońyr kesheni boıynsha yntymaqtastyqqa erekshe nazar aýdaryldy.
Kelissózderdiń mańyzdy bóligi retinde eki eldiń óńirlik ıntegratsııalyq birlestikter sheńberindegi ózara áreketi boldy.
Kelissózder barysynda Qazaqstannyń BUU Qaýipsizdik Keńesine turaqty emes músheligi qorytyndylanyp, kópjaqty formattaǵy Qazaqstan-Reseı yntymaqtastyǵy talqylandy. Eki vedomstvo basshylary halyqaralyq kún tártibindegi ózekti máseleler boıynsha óz ustanymdaryn tekserip, óńirlik jáne jahandyq qaýipsizdikti qamtamasyz etýge baǵyttalǵan kúsh-jigerdi úılestirýge qyzyǵýshylyq tanytty.
Kezdesý qorytyndysy boıynsha Qazaqstan men Reseı syrtqy saıası vedomstvolary arasyndaǵy 2019-2020 jyldarǵa arnalǵan yntymaqtastyq is-sharalary josparyna qol qoıyldy.
Jalpy alǵanda, syndarly syrtqy saıası yntymaqtastyqtyń mańyzdylyǵy men eki jaqty yntymaqtastyqty keńeıtý jáne tereńdetý, ıntegratsııalyq baılanystardy, óńirlik turaqtylyq pen qaýipsizdikti nyǵaıtý múddesi boıynsha kúsh-jigerdi úılestirýdiń mańyzdylyǵy atap ótildi.
Taraptar SІM-aralyq ózara is-qımylyn odan ári jyljytýdyń ózara rýhyn rastady.
Mınıstrliktiń málimetinshe, Qazaqstan Syrtqy saıası vedomstvo jańa basshysynyń alǵashqy ekijaqty sapary RF Syrtqy ister mınıstriniń shaqyrýymen ótti.
