Beıbit Atamqulov qurylys armatýrasynyń nege qymbattaǵanyn túsindirdi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov qurylys armatýrasynyń qymbattaý sebebin túsindirdi, dep habarlaıdy QazAqparat tilshisi.

«Bıyl bul álemdik úrdis bolyp tur. Bizde de, kórshilerimizde de, jalpy álemde qurylys materıaldaryna, qurylys armatýrasyna baǵa kúrt ósip ketti. Bul kóptegen eldiń pandemııadan keıin ekonomıkalyq daǵdarystan shyǵyp, qarqyndy qurylys júrgizip jatqanymen baılanysty», - dedi mınıstr Ortalyq kommýnıkatsııalar qyzmetinde ótken baspasóz máslıhatynda kelip túsken suraqqa oraı.

Onyń atap ótýinshe, shıkizat, metall synyqtarynyń baǵasy da kúrt qymbattady. Mundaı jaıt álemniń barlyq elinde baıqalady.

«Naryq jyldam ósip barady. Onyń baǵasy 320-330 myń teńgeden 400 myń teńgege jetip qaldy. Degenmen, kórshi Reseımen salystyrǵanda baǵa aıyrmashylyǵy shamamen 5 paıyzdy quraıdy. Armatýranyń úlken kólemin Reseıden satyp alyp otyrmyz. Ózimizdiń óndiris kólemimiz bar. Biraq, ol jetkiliksiz. Qurylys qarqyndy júrip jatyr. Osy jyly 17 mln sharshy metr turǵyn úı salýymyz qajet. Munyń barlyǵy baǵa parametrlerine áserin tıgizedi», - dedi Beıbit Atamqulov.