Beıbit Atamqulov: Qazaqstannyń qorǵanys-óndiristik kesheni sheteldiktermen seriktesýge daıyn

  ASTANA. QazAqparat - Qorǵanys-óndiristik kesheni salasynda Qazaqstan álemdik kompanııalarmen seriktese jumys atqarýǵa daıyn. Bul týraly «KADEX-2018» V halyqaralyq kórmesi ótip jatqan «ADVANCED DEF TECH» ǵylymı-praktıkalyq konferentsııasynda QR Qorǵanys jáne aeroǵarysh ónerkásibi mınıstri Beıbit Atamqulov málim etti, dep habarlaıdy QazAqparat tilshisi.

«Qazaqstannyń qorǵanys-óndiristik kesheniniń (QÓK) bizdiń eldiń ekonomıkasynda mańyzy óte zor. Eksporttyq áleýeti joǵary. Sonymen birge, ol áskerı qýattylyqqa ǵana emes, azamattyq sektorda da áserin tıgizedi. Memleket basshysy Nursultan Nazarbaevtyń tapsyrmasy aıasynda biz óz aldymyzǵa qorǵanys-óndiristik kesheniniń jumysynyń tıimdiligin arttyrýdy maqsat etýdemiz. Birshama nátıjelerimiz de barshylyq. Qazirgi tańda QR qorǵanys-óndiristik kesheni - 9 myń jumys orynyna ıe quramyna 40 kásiporyndy biriktirgen ǵylymdy qajet etetin júıe. Sondaı-aq, qosymsha kelisim sharttarmen jumys atqaryp jatqan alpysqa tarta kompanııa bar. Sońǵy ýaqytta bizdiń elde tehnologııanyń transferti qamtamasyz etilgen birlesken kásiporyndar jumys isteı bastady», - deıdi mınıstr.

Beıbit Atamqulov óz sózinde Qazaqstandaǵy kásiporyndar ártúrli áskerı qarýlardyń túrlerin óndirip jatqanyn atap ótti.

«Dese de, Qazaqstandaǵy QÓK-niń áleýeti tolyǵymen ashylmaǵanyn aıta ketkimiz keledi. Ary qaraı salany damytý úshin tereń jańǵyrtýdy júzege asyrý kerek. Biz kásiporyndarymyzdy jańǵyrtý josparyn jasap qoıdyq. Sebebi, kóptegen kásiporyndar keńestik korǵanys kesheninen qalǵan. Biz burynǵy óndiris bazasy arqyly qarýlandyrýdyń jańa túrlerin shyǵarýǵa kóshtik. Qazir bizge jańa tehnologııalyq jetekshi jobalar kerek. Sondyqtan, biz barynsha ashyqpyz. Seriktestikke daıynbyz. Álemdik iri kompanııalardy bizdiń alańǵa shaqyramyz», - dedi ol.

Mınıstr óz sózinde Qazaqstanda ótken jyly Úkimet ǵylymdy damytýdyń basymdyqtaryn jolǵa qoıǵanyn atap ótti.

«Qorǵanys jáne aeroǵarysh ónerkásibi mınıstrliginde biz ǵylymı-tehnıkalyq keńes qurdyq. Ol keńes arqyly biz barlyq áleýetti jobalardy qarastyramyz. Búgingi kúnde bizdiń tizimde elýge tarta áleýetti joba bar. Bul rette de seriktesýge daıynbyz. Bizdiń mınıstrlik ashyq dıalogqa daıyn», - dedi mınıstr.

Eske sala ketsek, keshe Astanada Elbasy Nursultan Nazarbaevtyń qatysýymen «KADEX-2018» V halyqaralyq kórmesi ashylǵan bolatyn. Kórme 26 mamyrǵa deıin jalǵasady. Kórmege Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan,Izraıl, Italııa syndy 40-tan astam elderdiń ókilderi qatysýda. Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin kórmede usynyp otyr. Kórmeni uıymdastyrýshy - QR Qorǵanys jáne aeroǵarysh ónerkásibi mınıstrligi, «Qazaqstan ınjınırıng» UK» AQ bolyp tabylady.