Beıbit Atamqulov: Qazaqstan - Túrkııa taýar aınalymy 50 paıyzǵa ósti
NUR-SULTAN. QazAqparat - QR Syrtqy ister mınıstri Beıbit Atamqulov Túrkııa Syrtqy ister mınıstri Mevlıýt Chavýshoǵlýmen strategııalyq josparlaý jónindegi birlesken tobynyń 5-shi otyrysynyń qorytyndylary boıynsha birlesken baspasóz máslıhatyn ótkizdi, dep habarlaıdy QazAqparat tilshisi.
«Búgin áriptesim, baýyrym Mevlıýt Chavýshoǵlýmen óte jemisti kezdesý ótkizdik. Qazaq halqy men túrik halqy tamyry tereń tartqan uly báıterektiń eki úlken butaǵy ispetti. Qazaqstan azattyq alǵannan keıin eki el arasyndaǵy yntymaqtastyq birden qarqyndy damı bastady. Búginde Qazaqstan men Túrkııa saıası, saýda-ekonomıkalyq, mádenı-gýmanıtarlyq, áskerı jáne basqa salalarda belsendi túrde yntymaqtastyq júrgizýde», - dedi QR Syrtqy ister mınıstri.
Beıbit Atamqulovtyń aıtýynsha, bıyl ekijaqty qarym-qatynastardyń strategııalyq deńgeıge kóterilgeniniń 10 jyldyǵy atalyp ótedi.
«Osy merzim ishinde memleket basshylarynyń tóraǵalyǵymen Joǵary deńgeıli strategııalyq yntymaqtastyq keńesi otyrystary úsh ret ótkizildi. Sońǵy ret ótken jyldyń qyrkúıek aıynda QR Tuńǵysh Prezıdenti - Elbasy Nursultan Nazarbaevtyń Túrkııaǵa resmı sapary kezinde boldy. Elbasy 2016 jylǵy 15 shildede Túrkııada oryn alǵan áskerı tóńkeris jasaý talpynysynan keıin Túrkııaǵa barǵan birinshi memleket basshysy», - dedi ol.
Mınıstr óz sózinde qazaq-túrik qarym-qatynastaryndaǵy Elbasy róli - erekshe ekenin, ony eki memleket arasyndaǵy baılanystardyń sáýletshisi desek te artyq emestigin aıtty.
«1991 jyldan bastap Nursultan Nazarbaev Túrkııaǵa 24 ret jumys jáne resmı saparmen bardy. Óz kezeginde Túrkııa Prezıdentteri Qazaqstanǵa 15 ret, Premer-mınıstrleri 6 ret kelip ketti. Elbasy bastamasymen túrkitildes memleketterdiń arasyndaǵy yntymaqtastyq tóńireginde Túrkitildes memleketterdiń yntymaqtastyq keńesi, Túrki akademııasy, TÚRKSOI, Túrki mádenıeti men murasy qory jáne TúrkPA sııaqty kópjaqty yntymaqtastyq formattary quryldy. Túrki memleketteri ony sypaıy túrde - Túrki áleminiń Aqsaqaly dep ataıdy. Búgin biz Qazaqstan men Túrkııa arasyndaǵy ekijaqty qarym-qatynastardyń baǵyttaryn talqyladyq. Álemdik jáne óńirlik saıasattyń ózekti máseleler boıynsha ustanymdarymyz sáıkes keledi. Áriptesimmen birge Joǵary deńgeıli strategııalyq yntymaqtastyq keńesi kezdesýlerinen buryn ótkiziletin Birlesken strategııalyq josparlaý tobynyń kezekti otyrysyn ótkizdik», - dedi Beıbit Atamqulov.
Onyń aıtýynsha, ekijaqty taýar aınalymyn bastapqyda 5 mlrd dollarǵa deıin kóterý jónindegi eki memleket basshysynyń tapsyrmasyna sáıkes jumystyń nátıjeleri baıqalǵan.
«Bıylǵy jyldyń alǵashqy toqsanynda ekijaqty taýar aınalymy aldyńǵy jyldyń osyndaı merzimimen salystyrǵanda 50 paıyzdan astam ósimdi kórsetip, 632 mln dollarǵa jetkenin atap ótkim keledi. Qazirgi ýaqytta Qazaqstan ekonomıkasynyń túrli salalarynda túrik kapıtalynyń qatysýymen 2200-den astam kásiporyn jumys isteıdi. Biz «Jańa sınergııa» birlesken ekonomıkalyq baǵdarlamany iske asyrý jónindegi is-sharalar josparyn jandandyrýǵa ýaǵdalastyq», - dedi Beıbit Atamqulov.
