Beıbit Atamqulov ındýstrııalandyrýdyń nátıjelerin jarııalady

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov ekinshi ındýstrııalyq besjyldyqtyń nátıjelerin aıtty, dep habarlaıdy QaAqparat tilshisi.

«2019 jyl ekinshi ındýstrııalyq besjyldyqty iske asyrýdyń sońǵy jyly bolyp otyr. Baǵdarlamany iske asyrý jyldary Qazaqstanda jańa ındýstrııalyq baza paıda boldy. Ol elimizdiń kóptegen óńirlerinde ónimdi jumysty jáne ekonomıkanyń turaqtylyǵyn qamtamasyz etti. Óńdeýshi ónerkásip kásiporyndary 43 trln teńgeniń ónimin (2010-2019 jyldary) shyǵardy. Qarasha aıynda óńdeýshi ónerkásip óndirisiniń kólemi bir aıda alǵash ret 1 trln teńgeden asyp tústi», - dedi Atamqulov Memleket basshysy Qasym-Jomart Toqaevtyń qatysýymen ótken «Altyn sapa» syılyǵyn tabystaý rásimine arnalǵan jıynda.

Osy oraıda, mınıstr saladaǵy eńbek ónimdiligi 35 myń dollarǵa jetkenin atap ótti.

Sonymen qatar, salada negizgi kapıtalǵa ınvestıtsııa aǵyny atalǵan merzimde 4,5 trln teńgeden (2015-2019 jyldary) asty.

«Atalǵan merzimde qazaqstandyq kásiporyndar óńdeýshi ónerkásip ónimderin 70 mlrd dollar kóleminde eksporttady. 2015 jyldan beri 5 trln teńgege jýyq ınvestıtsııa kólemimen Indýstrııalandyrý kartasynyń 500-den astam jańa jobasy iske qosyldy», - dedi mınıstr.

Sonymen qatar, vedomstvo basshysy metallýrgııada óndiris kólemi 2,2 esege artqanyn jetkizdi.