Beıbit Atamqulov: HH ǵasyrdaǵy «Star Wars» HHІ ǵasyrda shyndyqqa aınaldy

ASTANA. QazAqparat - Qazirgi tańda avtomattandyrylǵan basqarý júıeleriniń, tehnologııalyq protsesterdiń qorǵanys jaǵdaıy erekshe alańdatady. Kıberqaýipsizdik máseleleri talqylanǵan «KADEX-2018» kórmesiniń alańynda QR Qorǵanys jáne aeroǵarysh ónerkásibi mınıstri Beıbit Atamqulov osyndaı pikir bildirdi, dep habarlaıdy QazAqparat tilshisi.

«Qorǵanys ónerkásibi, ǵarysh salasy jáne kıberqaýipsizdik - bul ýaqyttyń ámiri. Búgingi tańda álemdegi tehnologııalyq kompanııalardyń konfıgýratsııasy mine osy úsh bloktan turady. Qazirgi tańda qorǵanys pen ǵarysh bir arnaǵa toǵysyp keledi. Aqparattandyrý, joǵary tehnologııalar, kıberqaýipsizdik, qorǵanys, ǵarysh - bári birge bir trendpen kele jatyr. Qorǵanys, áskerı jáne azamattyq salalardyń shekaralaryn ańdap otyrǵanda, sol shekaralardyń aqyryndap óshirilip kele jatqanyn baıqap otyrmyz. Bul -ýaqyttyń ámiri», - dep tujyrymyn qaıtalady Beıbit Atamqulov.

Mınıstrdiń aıtýynsha, HH ǵasyrda «Star Wars» kınolaryn kórsek, kóz aldymyzǵa elestete almaıtynymyzdy kitaptan izdep otyrsaq, búgingi kúni onyń bári shyndyqqa aınalyp shyǵa keldi.

Búgingi tańda «KADEX-2018» kórmesi Qazaqstanda besinshi ret ótkizilip otyr. Bizdikindeı jas mınıstrlik úshin bul alǵashqy kórme.

«Qazirgi tańda avtomattandyrylǵan basqarý júıeleriniń, tehnologııalyq protsesterdiń qorǵanys jaǵdaıy erekshe alańdatady. Osymen qatar olardyń sany jyl saıyn álemde birshama ósip keledi. Kıberqylmys salasyn aýyzdyqtaýdaǵy sarapshylarynyń aıtýynsha, tehnologııalyq jeliler hakerlik shabýylǵa osal bolyp otyr. Sonymen qatar, tehnologııalar jelilerdegi tez taraıtyn qaýipti baǵdarlamalardyń zııany aıtarlyqtaı alańdatady. Buǵan qosa ónerkásiptik saladaǵy jelilerde onyń zardabyn joıý asa kúrdeli», - deıdi ol.

Mınıstr sondyqtan «KADEX-2018» V halyqaralyq kórmesi ártúrli memleketterdiń kıberqaýipsizdik salasynda tájirıbe almasa alatynyn aıtty.

Eske sala ketsek, keshe Astanada Elbasy Nursultan Nazarbaevtyń qatysýymen «KADEX-2018» V halyqaralyq kórmesi ashylǵan bolatyn. Kórme  26 mamyrǵa deıin jalǵasady. Kórmege Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan, Izraıl, Italııa syndy 40-tan astam elderdiń ókilderi qatysýda. Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin kórmede usynyp otyr. Kórmeni uıymdastyrýshy - QR Qorǵanys jáne aeroǵarysh ónerkásibi mınıstrligi, «Qazaqstan ınjınırıng» UK» AQ.