Beıbit Atamqulov «ExxonMobil» kompanııasynyń basqarýshy dırektorymen kezdesti
NUR-SULTAN. QazAqparat - Syrtqy ister mınıstrliginde vedomstvo basshysy Beıbit Atamqulov «ExxonMobil» kompanııasynyń Qazaqstandaǵy basqarýshy dırektory Dınesh Sıvasambýmen kezdesti, dep habarlaıdy QazAqparat.
«Qazaqstan saıası jáne ekonomıkalyq baǵyttyń sabaqtastyǵyn saqtap otyr, bul jalpy bıznes qoǵamdastyǵy úshin mańyzdy belgi. Biz «ExxonMobil» kompanııasynyń áriptestik pen ózara tıimdi yntymaqtastyq rýhyn ustanýyn, sondaı-aq Qazaqstan ekonomıkasyn damytýǵa qosqan úlesin joǵary baǵalaımyz», - dedi Qazaqstannyń Syrtqy ister mınıstri.
«ExxonMobil» ókili óz qyzmetindegi aldaǵy josparlarymen bólisip, QR Úkimeti tarapynan ınvestorlarǵa kórsetilip otyrǵan qoldaýyn oń baǵalady.
«Investor retinde biz Qazaqstanmen yntymaqtastyqty jalǵastyrýǵa múddelimiz», - dedi D.Sıvasambý.
Kezdesý barysynda yntymaqtastyqtyń ózekti máseleleri men perspektıvalyq baǵyttary, onyń ishinde qaıta óńdeý salalaryn damytý jáne ındýstrııalandyrý úshin kompanııanyń ınvestıtsııalaryn qaıta paıdalaný máselesi talqylandy.
SІM basshysy «ExxonMobil» túrli salalardaǵy jańa ekonomıkalyq jobalarǵa óz qarajatyn qaıta ınvestıtsııalaý múmkindigin qarastyrýǵa, sondaı-aq amerıkalyq korporatsııanyń túrli ónimderin jetkizýge jumys atqaratyn jańa kompanııalardyń Qazaqstanǵa kelýine yqpal etýge shaqyrdy. Taraptar osy baǵyttaǵy dıalogty damytýǵa kelisti.
Sondaı-aq, «ExxonMobil» kompanııasy elimizdiń aýmaǵynda óndiriske, sondaı-aq áleýmettik baǵdarlamalarǵa, atap aıtqanda, kompanııa jumys isteıtin aımaqtarda jáne jalpy Qazaqstan boıynsha densaýlyq saqtaý jáne bilim berý salalaryna odan ári ınvestıtsııalaýǵa múddeli.
Sondaı-aq kezdesý barysynda D.Sıvasambý «ExxonMobil» kompanııasy basshylyǵynyń aldaǵy 32-shi Sheteldik ınvestorlar keńesiniń otyrysyna qatysýyn rastady.
Aıta keteıik, «ExxonMobil» eldegi alǵashqy batys ınvestorlarynyń biri jáne Qazaqstannyń bul kompanııamen yntymaqtastyǵyna 26 jyl boldy. Osy kezeńde Qazaqstanǵa salynǵan ınvestıtsııalardyń kólemi 22 mlrd. AQSh dollaryn qurady.
