Beıbit Atamqulov Eýropanyń «Airbus D&S» vıtse-prezıdentimen kezdesti

NUR-SULTAN. QazAqparat - QR Indýstrııa jáne ınfraqurylymdyq damý mınıstri Beıbit Atamqulov Eýropanyń «AIRBUS D&S» ushaq jasaý kontserniniń vıtse-prezıdenti Ioannıs Papakrıstofılýmen jumys kezdesýin ótkizdi, dep habarlaıdy QazAqparat atalǵan vedomstvonyń baspasóz qyzmetine silteme jasap.

Kelissózder barysynda Qazaqstannyń «AIRBUS» kontsernimen áýe qurylysy jáne ǵarysh salalaryndaǵy óndiristik kooperatsııasyn keńeıtý máseleleri qozǵaldy. Respýblıka aýmaǵynda «Ghalam» JShS jáne «Evrokopter Qazaqstan ınjınırıng» JShS sııaqty birqatar joǵary tehnologııalyq kásiporyndar qurylyp, jumys istep jatyr.

Kelissózder qorytyndysynda taraptar syndarly dıalog úshin bir-birine rızashylyq bildirip, qorǵanys ónerkásibi salasyndaǵy yntymaqtastyqty damytýdyń mańyzdylyǵyn atap ótti. «Evrokopter Qazaqstan ınjınırıng» JShS birlesken kásiporny 2011 jyly quryldy. Osy ýaqyt ishinde kásiporyn 31 tikushaq qurastyrdy. Onyń ekeýi - N125 - Ózbekstan men Tájikstanǵa eksporttaldy. 2030 jylǵa deıin jalpy somasy 168 mln eýroǵa 21 tikushaq shyǵarý josparlanǵan.
Sondaı-aq, Qazaqstanda «Airbus D&S»-pen ǵarysh apparattary men olardyń qurastyrǵyshtaryn óndirý jónindegi «Ghalam» JShS birlesken kásiporny jumys isteıdi. «Qazaqstan Ǵarysh Sapary» UK« AQ (72,5%) men AIRBUS D&S (27,5%) arasyndaǵy birlesken kásiporyn 2010 jyly tehnologııalar transfertin paıdalaný jáne iske asyrý, ınjınırıngtik qyzmetter kórsetý, ǵarysh apparattaryna jıyntyqtaýshylar óndirý jónindegi mamandardy daıarlaý úshin quryldy.