Beıbit Atamqulov Bishkekte Qytaıdyń Syrtqy ister mınıstri Van Imen kezdesti

BІShKEK. QazAqparat - Shanhaı yntymaqtastyq uıymyna múshe-memleketterdiń Syrtqy ister mınıstrleri keńesiniń (ShYU SІMK) otyrysyna qatysý qarsańynda QR Syrtqy ister mınıstri Beıbit Atamqulov Qytaı Halyq Respýblıkasy Memlekettik keńesiniń múshesi, Syrtqy ister mınıstri Van Imen kezdesti, dep habarlaıdy QazAqparat.

QR SІM baspasóz qyzmetiniń málimetinshe, Qazaqstan men Qytaı syrtqy saıası vedomstvolarynyń basshylary saıası, saýda-ekonomıkalyq salalardaǵy ekijaqty yntymaqtastyq, sondaı-aq kópjaqty qurylymdardaǵy ózara yqpaldasý máselelerin talqylady.

QR SІM basshysy bıylǵy jyldyń 25-28 sáýirde sátti ótken «Bir beldeý, bir jol» 2-shi Halyqaralyq yntymaqtastyq forýmyna qatysý úshin Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń saparynyń mańyzdylyǵyn atap ótti.

Osy forýmda Elbasy N.Nazarbaev álemdik qoǵamdastyqqa geosaıası ahýaldyń «Úsh D» úlgisin usyndy jáne qytaılyq tarapty ony júzege asyrý úshin odan ári jan-jaqty qoldaýdy surady.

Van I bıyl 14-16 mamyrda QKP Ortalyq komıteti Turaqty komıtetiniń múshesi, QHR Memlekettik keńesiniń vıtse-premeri Han Chjenniń Qazaqstan men Qytaı 2-shi Óńiraralyq yntymaqtastyq forýmyna jáne 12-shi Astanalyq ekonomıkalyq forýmyna qatysý úshin Qazaqstanǵa saparyn oıdaǵydaı ótkizilgeni úshin alǵys bildirdi.

Qytaı SІM basshysy Qazaqstanda aldaǵy ýaqytta ótetin prezıdenttik saılaýdyń tabysty bolatynyna senim bildirdi.

Qytaılyq tarap «Bir beldeý, bir jol» bastamasyn júzege asyrýda Qazaqstannyń jetekshi rólin erekshe atap ótip, ony «Nurly jol» JES-pen tereń ushtastyrý arqyly ózara kólik baılanystaryn kóterýdi, sondaı-aq ony ilgeriletýde eki eldiń kóshbasshylyǵyn saqtaýdy usyndy. Bul óz kezeginde, bizdiń elder arasynda tsıfrlyq ekonomıkany damytý, tsıfrlandyrý, joǵary tehnologııalyq, ınnovatsııalyq jáne elektrondyq kommertsııa salasyndaǵy jańa jobalardyń sanyn arttyrý boıynsha ındýstrııalyq-ınvestıtsııalyq yntymaqtastyqty nyǵaıtýǵa yqpal etedi.

Van I Qytaı Qazaqstanmen kópjaqty kún tártibindegi keń aýqymdy máseleler boıynsha da ózara tyǵyz yntymaqtastyqqa, QR Tuńǵysh Prezıdenti - Elbasy N.Nazarbaev qurýdyń basynda turǵan ShYU, AÓSShK sııaqty halyqaralyq uıymdar sheńberinde tıimdi úılestirýge múddeli ekenin atap ótti.

Syrtqy saıası vedomstvolarynyń basshylary eki eldiń ShYU-da birqatar bastamalaryna ózara qoldaýdy atap ótti, atap aıtqanda ShYU Damý bankin qurý, ulttyq valıýtadaǵy ózara esep aıyrysý úlesin ulǵaıtý, tranzıt-kóliktik áleýetin paıdalaný jáne t.b.

Taraptar ózara qyzyǵýshylyq týdyratyn máseleler boıynsha turaqty baılanystar men qoldaýdy jalǵastyrýǵa kelisti.