Beıbit Atamqulov áleýmettik nysandarda 1 sharshy metr qurylystyń shekti qunyn belgileýdi usyndy
NUR-SULTAN. QazAqparat – Áleýmettik nysandarda 1 sharshy metr qurylystyń shekti qunyn belgileý kerek. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.
«Mınıstrlik jobalaýdyń bastapqy kezeńinde boljamdy qunyn esepteý úshin «Onlaın-kalkýlıator» júıesin iske qosty. Statıstıkalyq derekter negizinde smetalyq baǵalardy qalyptastyrý boıynsha «KDS-Stat» aqparattyq júıesi engizildi», - dedi ol.
Mınıstrdiń atap ótýinshe, jobalyq sheshimderdi kóp márte qoldaný jáne birkelki qabyldaý úshin «Jobalyq smetalyq qujattamanyń biryńǵaı elektrondyq banki» quryldy.
«Memlekettik qarajat esebinen salynatyn áleýmettik nysandarda 1 sharshy metr qurylystyń shekti qunyn belgileý usynylady», - dedi Beıbit Atamqulov.
