Beıbit Atamqulov aldaǵy jylytý maýsymyna daıyndyq týraly aıtty

NUR-SULTAN. QazAqparat – Aldaǵy jylytý maýsymyna daıyndaq barysynda el aýmaǵynda 5 myń shaqyrym jylý qubyry, 11,2 myń shaqyrym sý qubyry jóndeýden ótýi tıis. Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda osyndaı aqparat berdi, dep habarlaıdy QazAqparat tilshisi.

«Aldaǵy 2021-2022 jylǵy jylý berý maýsymyna áleýmettik sala obektileriniń 65 myńnan astamyn daıyndaý qajet», - dedi Beıbit Atamqulov.

Onyń ishinde 6 myń densaýlyq saqtaý nysany, 11,2 myń bilim berý nysany, 47,6 myń turǵyn úı bar. Sondaı-aq, 11 myń avtonomdyq qazandyq qondyrǵylaryn jáne 19 myń shaqyrym ınjenerlik jelini qalypqa keltirý kózdelip otyr. Atap aıtqanda, 5 myń shaqyrym jylýmen jabdyqtaý jelisin, 14,2 myń shaqyrym sýmen jabdyqtaý jelisin maýsymǵa daıyndaý qajet.

«Jylý berý maýsymyna ýaqytyly jáne sapaly daıyndalý maqsatynda óńirlerge 1 maýsymǵa qaraı turǵyn úı-kommýnaldyq sharýashylyq, turǵyn úı jáne áleýmettik sala obektilerin daıyndaý jónindegi is-sharalar josparyn bekitý usynylady. Sondaı-aq, 1 qyrkúıekke deıin bilim berý obektileriniń 100% daıyndyǵyn qamtamasyz etý qajet. 15 qazanǵa deıin turǵyn úı-kommýnaldyq sharýashylyq, turǵyn úı, densaýlyq saqtaý jáne áleýmettik salanyń barlyq obektileriniń tolyq daıyndyǵyn qamtamasyz etý, qurylys normalary men erejelerin saqtamaı ornatylǵan avtonomdyq jylý berý júıelerin shyǵarýdy aıaqtaý, ınjenerlik ınfraqurylym júıesiniń jylý berý maýsymyna daıyndyǵyn belgilengen merzimde aıaqtaý, avtonomdyq qazandyqtarda otynnyń normatıvtik qoryn qamtamasyz etý jumystaryn tolyǵymen aıaqtaý kerek», - dedi vedomstvo basshysy.