Beıbit Atamqulov: Aqyly joldarǵa jańa tarıf áli engizilmeıdi

NUR-SULTAN. QazAqparat – Eldegi aqyly joldarda 2013 jylǵy tarıf qoldanylyp otyr. Indýstrııa jáne ınfraqurylymdyq damý mınıstri Beıbit Atamqulov halyq aldyndaǵy esebi kezinde osnydaı málimet aıtty, dep habarlaıdy QazAqparat tilshisi.

«Tarıfke keletin bolsaq, Qazaq jol ǵylymı-zertteý ınstıtýtynyń mamandary aýyr júk kólikteri úshin «38» degen san usynǵan bolatyn. Biraq mınıstrlik pen salalyq vedomstvo bul tarıfti bekitken joq. Qazir 2013 jylǵy tarıf qoldanylyn otyr. Aqyly negiz birtindep aqaýsyz ýchaskelerge ǵana engiziledi», - dedi mınıstr.

Sondaı-aq ol tólemaqy stavkalary jańa ýchaskelerde de saqtalatynyn eskertti.

«Kórshi elderde aqyly júıe talaıdan beri bar. Ondaǵy tarıftik mólsherlemeler Qazaqstanmen salystyrǵanda áldeqaıda joǵary. Salystyryp qarasaq, Reseıde júk mashınalary 1 km úshin 22 teńge tóleıdi, Italııa men Germanııada - orta eseppen 70 teńge, Belarýste - 80 teńge tóleıdi, al Horvatııada júk kóligi úshin jolda júrý 122 teńge turady», - dedi Beıbit Atamqulov.

Mınıstrliktiń resmı deregi boıynsha, qazir elimizdiń aqyly joldarynda tarıf jeńil avtomobıl úshin 1 shaqyrymǵa - 1 teńge.

Al avtobýstar úshin otyrǵyzý oryndarynyń sanyna baılanysty bir shaqyrymǵa 5-ten 15 teńgege deıin qubylady.

Aýyr júk kólik ıeleri bir shaqyrymǵa 5 teńgeden 25 teńgege deıin tóleıdi.